Komunidade Suku Usi-tasae La Asesu Bee-Moos

Hatutan.com, (08 Novembru 2024), Oé-cusse – Komunidade Suku Usi-tasae ho total abitante 4.398, kada tinan, la asesu bee-moos.

Lee Mós: Estudante EBF Binibu Pune Lori Bee-Moos Hosi Uma Bá Eskola

Suku Usi-tasae lokaliza iha Sub-Rejiaun Oesilo, Rejiaun Administrativu Oé-Cusse Ambeno (RAEOA) iha aldeia tolu, kompostu hosi Aldeia Pune, Sifin no Buqui ho total uma-kain 1.056 no abitante 4.398.

Abitante ida hosi Suku Usi-tasae, Oé-Cuse, lori jerigen sira bá buka bee-moos. Foto/Lazaro Pereira Quefi

“Ha’u mós preokupa kona-ba bee-moos tanba kada tinan kuaze iha suku laran komunidade sira la asesu ba bee-moos. Liliu iha Aldeia Pune hasoru problema boot kona bee-moos  ha’u preokupa liu tanba Aldeia Pune ne’e hanesan  sentru ba suku Usi-tasae nian iha eskola komesa hosi Pre-Primaria to’o Eskola sekundariu ho Sede Suku, Klinika no merkadu inklui komnidade lubuk ida mak hela iha ne’e. La’ós ne’e de’it, maibé iha aldeia seluk komunidade sira enfrenta problema hanesan” Xefi Suku Usi-tasae Thomas Colo hateten ba Hatutan.com iha sede suku Usi-tasae, Sesta (08/11/2024).

Nia rekoñese katak situasaun agora daudaun komunidade sira enfrenta ne’e defisil duni, maibé atu halo oinsá bee-matan iha balu mas dook hosi komunidade sira, ferik no katuas sira idade avansadu ona ne’e labele la’o dook hodi kuru bee-moos.

“Ami enkontru ona ho membru konselu suku sira, ha’u rona preokupasaun hotu-hotu hosi kada xefi aldeia sira, ikus tetu ba-mai katak planu prioridade suku ba tinan 2025 mak bee-moos, ne’e duni  ha’u haruka ona ha’u nia estrutura sira atu identifika bee-batan sira, atu ita bele hatene bee-matan ne’ebe mak uza sitema bomba no ida ne’ebe mak la uza  para ami bele dada ba too komunidade liliu ba eskola sira, klinika inklui merkadu. Ha’u garantia katak iha 2025 se iha hetan solusaun ba bee-moos, iha tina ida ne’e ha’u se buka meius oioin  atu rezolve problema bee iha suku,” Thomas Colo hateten.

Jornalista Estajiariu: Lazaro Pereira Quefi