CPN-PD Aprova Kalendáriu Kongresu Nasionál, Konferénsia Munisipál no Postu hosi Dezembru 2024 to’o Abríl 2025

Hatutan.com, (09 Novembru 2024), Díli-Partidu Demokrátiku (PD) liuhosi Segunda Sesaun Plenária Konsellu Polítika Nasionál (CPN-sigla portugés) iha Salaun Laline Lariguto CNE, Díli,  Sábadu (09/11/2024), deside no aprova ona kalendáriu bá realizasaun Kongresu PD nian iha nível Nasionál, Konferénsia Munisipál no Postu Administrativu hosi fulan-Dezembru 2024 to’o fulan-Abríl 2025.

Segunda Sesaun Plenária Konsellu Polítika Nasionál Partidu Demokrártiku (CPN-PD, sigla portugés) deside no aprova ona kalendáriu bá realizasaun Kongresu PD nian iha nível Nasionál, Konferénsia Munisipál no Postu Administrativu hosi fulan-Dezembru 2024 to’o fulan-Abríl 2025. Foto/Rogério Pereira Cárcerese

Aprovasaun bá kalendáriu sira kongresu no konferénsia nian ne’e liuhosi votasaun direta hiit-liman entre membru CPN sira mak nia reprezentante mai hosi postu administrativu, munisípiu inklui iha nasionál, ho totál votu Aprovadu 42, Kontra ida (1) no  Abstensaun ida (1).

“Kongresu sei halo iha loron 19 to’o 20 fulan-Abríl 2025. Depois antes kongresu nasionál, data ne’ebé propoin atu halo konferénsia postu administrativu, maka hahú iha loron  14 fulan-Dezembru 2024 to’o loron 23 fulan-Fevereiru 2025. Hafoin halo konferénsia postu administrativu, hakat bá konferénsia munisipál, maka hahú iha loron 18 fulan-Janeiru to’o loron 15 fulan-Marsu 2025,” Prezidente CPN, Adriano do Nascimento, deklara durante Segunda Sesaun Plenária CPN PD nian.

Prezidente CPN ne’e mós fó sai Rezolusaun Númeru 2/CPN/IX/2024, kona-bá Kalendáriu Kongresu Nasionál, Konferénsia Munisipál no Postu Administrativu.

CPN hatuur aan bá estatutu Partidu Demokrátiku, artigu 56, ne’ebé dehan, CPN nu’udár órgaun reprezentativa partidu nian, artigu 58, númeru 1 no 2, kona-bá Kompeténsia CPN, hodi tau matan bá lala’ok polítiku, aprova programa, orsamentu no kalendáriu polítiku partidu nian, tuir mandatu kongresu nasionál, halo akompañamentu permanente no konstante bá servisu konsellu ezekutivu nasionál, artigu 59, númeru 2 kona-bá Mandatu no Funsionamentu CPN, hodi halo reuniaun ordináriu no estraordináriu.

CPN hatuur aan bá estatutu Partidu Demokrátiku, artigu 35, númeru 2 no 2, konjuga ho artigu 153, númeru 4, ne’ebé haktuir katak, kogressu nasionál regulármente halo dala-ida iha tinan-lima nia laran, no halo dentru iha tinan ida, hafoin eleisaun lejislativa, ba-sá, tuir estatutu PD, Artigu 32, konjuga ho Artigu 153, númeru 1, ne’ebé dehan, kongressu nasionál mak nu’udár órgaun aas liu iha PD, ne’ebé nia kompeténsia deliberativa kona-bá formulasaun polítika, estratéjia no eleze estrutura no lideransa partidu nian.

CPN hatuur aan bá estatutu PD, artigu 160, númeru 2 ne’eb’e dehan, reuniaun plenária nu’udár forum ne’ebé realiza hodi deside no halo avaliasaun bá atividade polítika balu, ne’ebé la inklui iha programa servisu regulár partidu nian.

Drijente Partidu Demokrátiku. Foto/Rogério Pereira Cárcerese

Konsellu Polítiku Nasionál, tétu ho klean, hodi konsidera nesesidade Partidu Demokrátiku, atu reorganiza aan hosi nível nasionál, munisípiu no postu administrativu, liuhosi kongresu nasionál, konferénsia munisipál no konferénsia postu administrativu.

Tétu ho klean, hodi konsidera konkluzaun no rekomendasaun, hosi membru CPN, ne’ebé hakláken liuhosi Segunda sesaun plenária CPN nian, tétu ho kle’an hodi konsidera servisu tékniku, bá preparasaun no implementasaun kongressu nasionál, konferénsia munisipál no konferénsia postu administrativu. Nune’e, mak liuhosi Segunda sesaun plenária CPN, Partidu Demokrátiku, ne’ebé halo iha loron 09 fulan-Novembru 2024, iha Salaun Laline Lariguto CNE-Dili, Dirasaun Nasionál no Membru Konsellu Nasionál Partidu Demokrátiku, hakotu, hodi tuir artigu 153, númeru 3, kona-bá Aprovasaun Kalendáriu Kongresu Nasionál, ne’ebé propoin hosi konsellu ezekutivu nasionál PD, hodi hatuur katak;

1. Kongressu Nasionál Partidu Demokrátiku, sei halo iha loron 12 to’o loron 20 fulan-Abríl 2025.
2. Molok halo kongressu nasionál PD, sei halo uluk konferénsia postu administrativu, hodi hili delegadu sira atui tuir konferénsia munisipál, ne’ebé sei hahú iha loron 14 fulan-Dezembru 2023 to’o loron 23 fulan-Fevereiru 2024.
3. Hafoin halo konferénsia administrativu, mak halo fali konferénsia munisipál, hodi hili delegadu sira atu tuir kongressu nasionál, ne’ebé sei hahú iha loron 18 fulan-Janeiru to’o loron 19 fulan-Marsu 2024.
4. Kongressu no Konferénsia órgaun da massa OMD, JD, MPD, sei halo iha loron 22 to’o loron 30 fulan-Marsu 2025.
5. Fó konfiansa tomak bá konsellu ezekutivu nasionál PD, atu organiza kongressu nasionál, konferénsia munisipál no konferénsia postu administrativu iha territóriu Timor-Leste.
6. Hakotu hodi hakláken katak, rezolusaun ida ne’e tama iha vigóra, hafoin aprovasaun no publikasaun.

Sekretáriu jerál PD, António da Conceição “Kalohan” husu bá estrutura ezekutivu sira munisípiu nian, iha fulan-ida atu halo reajustamentu. Ida ne’e servisu operasionais ne’ebé munisipiu sira, CPD la presiza define iha kalendáriu.

“Importante liu bá ita maka ida ne’e, sé ita atu tama bá loron 14 fulan-Dezembru atu hahú ona konferénsia a-nível postu administrativu, signifika prienximentu bá estrutura iha suku sira, tenke la’o tiha ona. no tanba ida ne’e mak ita fó espasu ida, lori fila-fali to’o dia 18 de janeiru ne’e, hodi hanoin dehan katak, oportunidade ida fulan-novebru bá dezembru ne’e, ita sei bele halo servisu ida ne’e. No ida ne’e ha’u hanoin, la presiza nasionál maka tenke halo planu hotu. munisipiu sira iha imi ninia desizaun, tuir tempu ne’ebé mak imi iha, sura mós bá periodu natál ninian ne’ebé mak ita atu liu, atu ita bele planeia atividade sira ne’e,”  António “Kalohan” afirma.

Jornalista: Rogério Pereira Cárceres