Xanana Husu Bankada Fretilin Aprezenta Dadus Kona-bá Asesór Simu Saláriu $25,000

Hatutan.com, (13 Novembru 2024), Díli-Membru Parlamentu Nasionál (PN) hosi Bankada Fretilin, Lidia Norberta dos Santos Martins,  kestiona saláriu asesór balu iha Gabinete Primeiru-Ministru kada fulan $25,000.

Lee Mós: OJE 2025 bá Gabinete PM Xanana $3,884,402 Pasa iha Espesialidade

Primeiru-Ministru Xanana Gusmão. Foto/Dok.Elio dos Santos da Costa

Liuhosi plenária diskusaun Orsamentu Jerál Estadu (OJE) 2025 iha faze espesialidade, Kuarta (13/11/2024), Deputada Lidia Norberta dos Santos Martins nu’udar membru PN hosi opozisaun ne’ebé reprezenta povu husu klarifikasaun bá Primeiru-Ministru (PM) Xanana Gusmão atu konfirma saláriu bá asesór balu iha Gabinete Primeiru Ministru kada fulan $25,000 ne’e oinsá?

“Iha asesór balu hetan saláriu $25,000. Ida-ne’e ami atu reklama la’ós dehan atu reklama ba ami nia an atu hetan informasaun, tanba ne’e orsamentu jerál estadu, ita hotu-hotu tenke hatene ida ne’e tanba ne’e hanesan esklaresimentu ida ita tenke  hatene, ” Lidia Norberta dos Santos Martins hateten.

Hatán ba preokupasaun ne’e, Primeiru-Ministru (PM) Xanana Gusmão husu atu Deputada sira aprezenta dadus.

“Atu husu de’it, favor ida ba deputada ne’ebé dehan katak iha asesór iha gabinete Primeiru-Ministru nian ne’ebé manan $25,000  ne’e fó hela naran mai ba, karik iha asesór ruma iha governu tomak mak manan $25,000 kada fulan. Favor ida fó hela mai ba para ami hasai tiha, duni sai tiha” Xanana afirma.

Hafoin rona Primeiru-Ministru nia deklarasaun  iha intervensaun ba diskusaun sesaun daruak nian,  Deputada bankada opozisaun ne’e  haktuir katak  kona-bá  asesór ne’e nia parte  labele fó naran nune’e  husu mós ba governu atu aprezenta  lista asesór ho sira-nia remunerasaun ba iha Parlamentu Nasionál.

Jornalista: Leopoldina de Carvalho