PDHJ Konvida Prezidente Repúblika Abertura Enkontru Anual SENAF ba Dala-XXI

Hatutan.com, (19 Novembru 2024), Díli- Provedória dos Direitos Humanos e Justiça (PDHJ) konvida Prezidente Repúblika José Ramos-Horta atu halo abertura ba Enkontru Anuál Fórum Nasionál Direitus Umanus ba Sudeste Aziátiku (SEANF) ba dala-XXI ne’ebé sei hala’o iha Díli, Kuarta (20/11/2024).

Lee Mós: PDHJ ho CNC Fasilita Audiénsia Kona-bá Violasaun Direitu Umanu iha Myanmar

Provedor Virgílio da Silva Guterres ho nia ekipa hosi PDHJ halo audénsia ho Prezidente Repúblika, José Ramos-Horta, Tersa (19/11/2024). Foto/Elio dos Santos da Costa

Provedór Direitu Umanu no Justisa, Virgílio da Silva Guterres ba jornalista sira iha Palásiu Prezidensiál, Tersa (19/11/2024), informa sira-nia parte mai hasoru Prezidente Repúblika bazeia ba pedidu atu halo audénsia ne’ebé submete ona iha semana hirak liubá maibé tanba Prezidente Repúblika laiha fatin tanba ne’e ohin mak foin bele hasoru.

Nia afirma objetivu prinsipál mak atu konvida Prezidente Repúblika halo abertura ba semináriu internasionál ka,Enkontru Anual ne’ebé SENAF halo.

Fórum Nasionál Direitus Umanus ba Sudeste Aziátiku ne’ebé tinan 2024 PDHJ mak lidera hahú horisehik, ohin, halo hela enkontru anual iha Ótel Novu Turizmu aban taka ho semináriu internasionál ho topiku Direitu ekonómiku sosiál kulturál iha área fronteira,”  Provedór Virgílio da Silva Guterres hateten.

Iha semináriu internasionál ne’e PDHJ konvida oradór sira ne’ebé parseria ho PDHJ rasik hodi fahe sira nia esperiénsia kona-ba situasaun ekonómiku sosiál no kulturál iha área fronteira.

Iha enkontru ne’e Prezidente Repúblika José Ramos-Horta  konfirma, aban dader sei ba partisipa semináriu internasionál refere no delegadu sira ba Enkontru Anuál SENAF ne’e mak Komnas HAM Indonézia, SUHAKAM Malázia, CHRP Filipina, NHRCT Tailándia, ho MNHRC Myanmar.

Jornalista: Vito Salvadór