Marçal dos Santos Vicente Eleitu ba Prezidente Asosiasaun Futeból Bobonaro

Hatutan.com, (03 Dezembru 2024), Díli- Marçal dos Santos Vicente, eleitu ba Prezidente Asosiasaun Futeból Bobonaro (AFB) hafoin halakon nia adversáriu Domingos Gouveia Moniz iha Kongresu ordináriu ne’ebé hala’o iha  Munisípiu Bobonaro, Sábadu (3/11/2024).

Lee Mós: La Merese Militár Tama iha Kongresu Estraordináriu FFTL

Termu posse no juramentu ba estrutura eleitu Asosiasaun Futeból Munisípiu Bobonaro. Foto/Espesiál

Prezidente AFB eleitu Marçal dos Santos Vicente manan nia adversáriu ho votu 12 husi totál votu 22 ne’ebé ezerse sira nia direitu votu iha kongresu ne’e.

Prezidente AFB eleitu Marçal dos Santos Vicente ba Hatutan.com via telefónika, foin lalais ne’e, informa hosi i Kongresu AFB nia membru asosiasaun hamutuk 22 no husi membru sira ne’e maioria ka 12 mak fó votu konfiansa ba nia atu lidera AFB ba mandatu ida tuir estatutu Asosiasaun no Federasaun Futeból Timor-Leste (FFTL) haruka.

Nia vizaun lori Futeból iha Asosiasaun Bobonaro hakbesik ba komunidade, liu-liu ba juventude ne’ebé iha talentu ba Futeból tantu feto no mós mane.

“Ami kompromete atu organiza kompetisaun iha nivel munisípiu no postu administrativu hodi hamosu jogadór ne’ebé iha talentu atu bele kompete iha nivel munisípiu to’o ba nasionál  hodi reprezenta nasaun iha kompetisaun rejionál no internasionál sira,” Marçal dos Santos Vicente hateten.

Prezidente Asosiasaun Futeból Bobonaro (AFB)  eleitu ne’e hatutan planu ba tempu badak nian, ezekutivu sei haree atu hahú halo komunikasaun no koordenasaun ho asosiasaun membru sira hodi oinsá bele forma estrutura atu nune’e bele garante funsionamentu servisu AFB nian hodi fó satisfasaun ba membru sira no sosiedade hadomi futeból iha Munisípiu Bobonaro.

Klube sira ne’ebé partisipa iha kongresu AFB no ezerse sira nia direitu ba vota mak hanesan FC MADIRAN, FC RIVER BULOBO, FC MARIA TAPO, FC MEMORIA, FC DEGANADORES , FC RUSA, FC USlLU, FC ABOMKASE, FC ZEBRA, FC DUABESI, FC SAHOL,  FC HUL TOPOL, FC SOBO AI, CTFJTL-M. B, COR. ARBT FUTSAL, COR.ARBT FOTEBOL no ikus liu BOBONARO LEGEND.

Jornalista: Vito Salvadór