Governu Seidauk Hanoin Reativa Arte-marsiál

Hatutan.com, (05 Dezembru 2024), Díli- Primeiru-Ministru, Kay Rala Xanana Gusmão louva ho maturidade foin-sa’e sira nian hodi kontribui ba estabilidade no pás tamba ne’e governu sidauk iha hanoin atu reativa arte-marsiál iha Timor-Leste.

Lee Mós: Governu Kontínua Suspende Atividade Prátika Arte-Marsiál bá Fulan-6 Tan

PM Xanana Gusmão. Foto/Dok.Tome da Silva

“Governu seidauk iha hanoin atu reativa  arte-marsiál. Seidauk, sorte boot ona, foin daudauk iha konsertu ida iha stadium Munisipál kampu nian nakonu ho joven, kontente, tanba ikus mai la akontese buat ida, di’ak ona no di’ak tebes-tebes,” Xanana Gusmão  hateten ba jornalista sira iha Palásiu Prezidensiál, Kinta (05/12/2024).

Xefe Governu hatutan ho situasaun sira ne’e hotu maka ohin informa mos Prezidente Repúblika kapás tebes-tebes, joven sira komesa hatudu di’ak ona katak, hatene saida maka estabilidade no armonia.

Liuhosi desizaun Konsellu Ministru sira-nian,  loron 30 fulan-Outubru 2024, kontínua suspende atividade grupu arte-marsiál no arte-rituál to’o loron 10 fulan-Abríl 2025.

Grupu arte-marsiál ne’ebé Governu deside suspende nia atividade mak Persaudaraan Setia Hati Terrate (PSHT), Ikatan Keluarga Silat Putera Timor-Leste (IKS PTL) Kera Sakti, Kmanek Oan Rai-Klaran (KORK) ho arte-rituál Sete-Sete (77).  

Informa mós Rezultadu Vizita ba Malázia

Primeiru-Ministru Kay Rala Xanana Gusmão hateten iha sorumutuk semanál ho Prezidente Repúblika ne’e informa mós  nia vizita ofisiál ba Malázia, Domingu-Tersa (01-03/12/2024).

“Ha’u informa ba Prezidente Repúblika kona-bá vizita ba Malázia no  mós informa Prezidente kona-bá  servisu ne’ebe governu iha atu hala’o,” Xanana Gusmão hateten.

Jornalista: Vito Salvadór