Komisaun F-PN Preokupa Hahán ba Pasiente iha HNGV Uza Produtu Importadu

Hatutan.com, ( 11 Dezembru 2024), Díli—Komisaun F Parlamentu Nasionál (PN) ba asuntu Saúde, Seguransa Sosiál no Igualdade Jéneru preokupa hahán ba pasiente sira iha Ospitál Nasionál Guido Valadares (HNGV) uza produtu importadu.

Ospitál Nasionál Guido Valadares (HNGV, sigla portugés). Foto/Tome da Silva

Iha fiskalizasaun Komisaun F-PN nian iha Dapur HNGV, fulan hirak liubá, rekomenda ona ba  empreza fornesedór hahán ba pasiente iha HNGV atu hamenus produtu importadór no karik uza na’an sira importadu tenke eskalda uluk.  

Prezidente Komisaun F-PN,  Maria Gorumali Barreto, Kuarta (11/12/2024), iha Parlamentu Nasionál, informa Komisaun F sei halo fiskalizasaun ba HNGV hodi observa direta fasilidade, atendementu, medikamentu no mós liu-liu  atendementu hahán ba pasiente sira atu bele garantia pasiente sira bele asesu hahán no nutrisaun aas.

Deputada bankada CNRT ne’e haktuir katak  kada tinan Governu aloka orsamentu ba setór saúde atu hadi’a servisu saúde, maibé realidade iha asuntu balun Komisaun F nota pasiente nia hahán iha barak liu uza produtu importadu.

“Ami seidauk iha fiskalizasaun ida ne’ebé mak fokus ba iha menu hahán   ne’ebé mak hosi kompaña sira fornese ba pasiente sira iha HNGV  tempu badak ami sei fiskalizasaun ba dapur HNGV Maria Gorumali Barreto  hateten.

 Rekomenda ba Governu Harii Laboratóriu Teste Hahán Importadu

Komisaun F PN rekomenda ba Governu atu  estabelese laboratoriu espesiál ida nune’e bele  halo teste ba produtu importadu sira, hanesan   na’an no seluk tan atu bele garante hahán saudavel ba povu.

“Ita hotu hatene katak ita seidauk iha laboratoriu ne’ebé mak espesfiku atu bele hala’o análize ba iha ai-han importadu sira, maibé foin lalais ne’e iha debate orsamentu 2025 ami mós rekomenda ba Governu atu tau prioridade mós ba estabelese laboratoriu espesfiku teste ba ai-han importadu,”  nia hateten.

Jornalista : Leopoldina de Carvalho