Kaptura Ona Autór Ne’ebé Halo Gravasaun Vídeo bá Sidadaun Na’in-tolu iha Beduku no Viral iha SosMed

Hatutan.com, (12 Dezembru 2024), Díli-Forsa konjunta kompostu hosi Polísia Nasionál Timor-Leste (PNTL) ho FALINTIL-Forsa Defeza Timor-Leste (PNTL),  Kinta (12/12/2024), kaptura tán ona autór ida ho inisial AL deskonfia halo gravasaun video bá sidadaun joven na’in-tolu iha área Beduku, no ikus mai espalla no viral iha sosial média (SosMed) Facebook.

Lee Mós: Autoridade Sira Detein Autór Na’in-haat ho Kro’at Ameasa Sidadaun Na’in-tolu iha Beduku no Viral iha SosMed

Autoridade sira lori autór (klaran) ne’ebé halo video ba sidaduan na’in-tolu iha Beduku lori ba halo idneitifkasaun, Kinta (12/12/2024). Foto/Elio dos Santos da Costa

Autór AL ne’e Forsa Konjunta sira bá foti iha nia  hela-fatin iha Beduku, Postu Administrativu Laulara, Munisípiu Aileu no transporta kedas mai iha Departamentu Investigasaun Kriminál (DIK) Nasionál PNTL hodi halo identifikasaun.

Iha loron ida antes, Forsa Konjunta kaptura uluk ona autór na’in-haat ho inisial SL, SG, BAM no SX. Sira ne’e kaptura iha Addeia, Suku Tohu-Metan, Postu Administrativu Laulara, Munisípiu Aileu.

Sidadaun sira ne’e Forsa Konjunta halo kapturasaun tanba uza kro’at (katana) hodi ameasa sidadaun joven na’in-tolu iha área Beduku, iha kedas fulan-tolu liubá.

Rezultadu Identifikasaun Investigadór sira DIK Nasionál nian konklui ona, no sei enkamiña nia auto-notísia bá Ministériu Públiku (MP) hodi hein prosesu tuir mai.

Forsa Konjunta sira ne’ebé hahú halo operasaun iha kuarta horseik, mai hosi Sosiedade Intelijénsia nia ema sira mak hanesan Servisu Informasaun Polísia (SIP), Servisu Informasaun Militár (SIM), Unidade FALINTIL, Makikit, Komandu Operasaun Dili ho Ekipa DIK Nasionál.

Jornalista: Rogério Pereira Cárceres