PM Xanana Orienta MOP ho MPIE Avalia Empreza Nasionál Sira

Hatutan.com, (12 Dezembru 2024), Díli- Primeiru-Ministru Kay Rala Xanana Gusmão  fó  orientasaun ba Ministériu Obras Públikas (MOP) ho Ministériu Planeamentu no Investimentu Estratéjiku (MPIE) atu halo avaliasaun ba empreza nasionál sira hodi haree sira-nia ezekusaun ba projetu sira ne’ebé Governu fó.

Lee Mós: Irregularidade Boot iha Projetu Monumentu Memoriál Masakre Santa Krús

Servisu konstrusaun ponte Kofi Annan. Foto/Tome da Silva

Primeiru-Ministru Kay Rala Xanana Gusmão ba jornalista sira iha Palásiu Prezidensiál, Kinta (12/12/2024), hateten iha regra sira ne’e hotu, Governu mós haree ba aprovizionamentu tanba empreza balun kaer projetu haat, lima to’o neen, ida la’o, seluk la la’o ne’ebé depois prosesu aprovizionamentu no buat sira ne’e hotu.

“Agora ha’u hein hela husi Ministériu Obras Públiku no Ministériu Planu Estratéjiku atu halo avaliasaun ida hodi haree empreza nasionál ida simu projetu hira no halo hira depois ha’u komesa ona haree tanbasá mak empreza sira ne’e simu de’it la halo no ita fó nafatin,” Primeiru-Ministru Xanana Gusmão hateten.

Xefe Governu hatutan atu hadi’a iha futuru bainhira see de’it mak kaer governu hatene ona katak iha tiha ona regra se lae Timor-Leste nune’e hela de’it.

Governu sei haruka Dekretu-Lei kona-ba regra ezekusaun OJE 2025 ba PR

Primeiru-Ministru Kay Rala Xanana Gusmão hateten IX Governu Konstitusionál sei haruka Dekretu-Lei kona-ba ezekusaun Orsamentu Jerál Estadu (OJE) tinan 2025, tanba bainhira laiha regra didi’ak sei hamosu problema boot iha jestaun finanseiru.

Primeiru Ministru, Kay Rala Xanana Gusmão hatutan enkontru semanál ho Prezidente Repúblika, José Ramos-Horta fó hatene kona-ba reuniaun Konsellu Ministru ne’ebé aprova tiha dekretu lei lubuk ida no atu haruka kedas mai Prezidente Repúblika hodi hetan promulgasaun tanba Xefe Estadu sei sai ba liur iha loron 14 fulan-Dezembru agora.

 Xefe Governu subliña problema bo’ot ida ne’ebé foun iha normas ezekusaun nian mak iha auditoria interna hodi haree didi’ak, tanba lae osan povu nian gasta arbiru de’it.

Jornalista: Vito Salvadór