Prezidente Repúblika Husu Governu Reativa Atividade Arte-Marsiál

Hatutan.com, (12 Dezembru 2024), Díli- Prezidente Repúblika José Ramos-Horta husu ba IX Governu Konstitusionál atu hapara suspensaun ka reativa atividade arte-marsiál iha Timor-Leste.

Lee Mós: Governu Seidauk Hanoin Reativa Arte-marsiál

PR Ramos-Horta ho PM Xanana halo enkontru semanál iha Palásiu Prezidensiál, Kinta (12/12/2024). Foto/Elio dos Santos da Costa

Prezidente Repúblika (PR), José Ramos-Horta hato’o pedidu ne’e direta ba  Primeiru-Ministru Kay Rala Xanana Gusmão, liuhosi enkontru semanál   ne’ebé  hala’o iha Palásiu Prezidensiál, Kinta (12/12/2024).

“Iha enkontru ne’e, ha’u mós husu ba Primeiru-Ministru favór haree kona-bá bandu arte-marsiál, entaun semana ne’e mai,  konsellu ministru sei  haree para foti tiha bandu ne’e, para husik arte-marsiál halo nian atividade,” Prezidente Repúblika, José Ramos-Horta hateten  ba jornalista sira.

Xefe Estadu hatutan problema boot ho arte-marsiál sira maka ladún iha kontrolu, maibé iha fulan hirak nia laran ne’e, la rona atividade ne’ebé maka violentu iha sosiedade. Tanba ne’e, husu ba Primeiru-ministru sira favor hasai tiha bandu ne’e.

Primeiru-Ministru Kay Rala Xanana Gusmão hateten kontente tanba joven sira hatudu maturidade hodi mantein situasaun kalma no hakmatek iha sosiedade.

“Ita husu boot to’o fulan-Dezembru ne’e remata laiha buat ida akontese iha ita-nia rai, kontente tanba joven sira bele asume devér boot ida atu kria estabilidade, armonia iha ita nia rai,” Primeiru-Ministru Kay Rala Xanana Gusmão hateten.

Antes ne’e, iha ssorumutuk Konsellu Ministru ordináriu, Kuarta (30/10/2024), iha Palásiu Governu, aprova  projetu Rezolusaun Governu nian ida hodi kontínua halo suspensaun ka hapara atividade sira prátika grupu arte-marsiál nian bá fulan-neen (6) tán.

 Rezultadu Konsellu Ministru nian iha komunikadu imprensa ne’ebé Hatutan.com asesu fó sai katak, rezolusaun Governu ida ne’e extende to’o loron 10 fulan-Abríl 2025, suspensaun bá ensinu, aprendizajen no prátika arte-marsiál no enserramentu temporáriu bá fatin no instalasaun hotu-hotu ne’ebé destinadu bá ensinu, aprendizajen no prátika arte-marsiál, ne’ebé inisiálmente hetan aprovasaun hosi Rezolusaun Governu n. 17/2024, loron 24 fulan-Abríl.

Objetivu hosi Rezolusaun Governu nian ida-ne’e  atu konsolida no reforsa pás sosiál ne’ebé alkansa ona husi kedas fulan-Novembru tinan 2023. Ho abordajen ida ne’ebé konsideradu no kontroladu, hakarak atu iha futuru, permite prátika arte-marsiál nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika arte-marsiál no enserramentu temporáriu ba ninia fasilidade sira.

Jornalista: Vito Salvadór