Nasionál
2024, Ema 117 Lakon Vida Tanba Asidente Tráfegu
Hatutan.com, (07 Janeiru 2025), Díli- Polísia Nasionál Timor-Leste (PNTL), Departamentu Tránzitu no Seguransa Rodoviáriu Nasionál, rejista ema na’in-117 lakon vida ka mate tanba asidente tráfegu motór no karreta iha tinan 2024.
Lee Mós: Polísia Tránzitu Prende Karreta Estadu 121 no Infratór sira Selu Koima $9000
Asidente tráfiku iha área Karavela, Postu Administrativu Vemasi, Munisípiu Baucau, 18 fulan-Dezembru 2024. Foto/Espesiál
Komandante Departamentu Tránzitu no Seguransa Rodoviáriu Nasionál, Superintendente Asistente Luís Costa, informa, hosi kedas loron 01 fulan-Janeiru to’o loron 31 fulan-Dezembru 2024, rejista kazu asidente tráfegu hamutuk 2219 ne’ebé mak akontese iha territóriu nasionál.
“Hosi kazu asidente ne’ebé mak ami rejistu, ema lakon vida hamutuk 117, no mós ema kanek-todan 2558, ema kanek-kaman 465,” Komandante Luís Costa, informa bá Jornalista sira liuhosi konferénsia imprensa iha Kuartél Jerál PNTL, Caicoli-Dili, Tersa (07/01/2025).
Hosi totál kazu sira ne’e, Polísia Tránzitu konsege prosesa kazu 972 bá Ministériu Públiku (MP), kazu 30 mak nia prosesu finaliza ona iha Tribunál, maibé iha kazu 101 mak Tribunál prosesa hela.
Iha mós kazu 1115 mak rezolve iha nível infratór sira ka rezolve família. Tuir observasaun no rezultadu análize Polísia nian, kazu asidente tráfegu sira ne’e akontese tanba fatór umanu mak no ho persentajen ne’ebé mak boot. Fatór umanu porsentu 95 (95%), fatór veíkulu porsentu 2 (2%), no fatór kondisaun estrada ho porsentu 2 (2%).
“Agora, komparasaun kazu asidente nian iha tinan 2023 ho 2024 ninian, iha tinan 2023 iha kazu asidente hamutuk 1964, mais iha tinan 2024 nian, sa’e fali bá iha 2218. Entaun, tinan ida ne’e nian aumenta tán kazu hamutuk 254,” Luís Costa informa.
Atu evita no minimiza númeru asidente iha 2025, medida prevensaun ne’ebé Polísia Tránzitu sei halo maka, maximiza nafatin sosializasaun no sensibilizasaun lei kódigu estrada nian númeru 06/2023 bá iha komunidade.
Jornalista: Rogério Pereira Cárceres