2027, Hahú Eleisaun ba Governu Lokál iha Munisípiu Balun

Hatutan.com, (16 Janeiru 2025), Díli- Primeiru-Ministru (PM), Kay Rala Xanana Gusmão, deklara IX Governu Konstitusionál halo hela esforsu másimu atu haree kalendáriu preparasaun ba eleisaun autoridade ka governu lokál ne’ebé tuir planu sei realiza iha 2027 ba oin.

Lee Mós: Governu Aprova Estratéjia Desentralizasaun Administrativa no Instalasaun Órgaun Reprezentativu Podér Lokál 2025-2028

Primeiru-Ministru Kay Rala Xanana Gusmão. Foto/Tome da Silva

Primeiru-Ministru (PM), Kay Rala Xanana Gusmão hateten, Kinta (16/01/2025), hafoin enkontru semanál ho  Prezidente Repúblika iha Palásiu Prezidensiál, Díli.

PM Xanana mós informa  ba Prezidénsia Repúblika kona-ba desizaun Konsellu Ministru kona-bá rezolusaun ida oinsá mak kalendáriu preparasaun ba eleisaun autoridade ka governu lokál, mais ne’e la’ós atu la’o dala ida de’it.

“Iha Marsu ba oin ha’u sei la’o atu haree fila fali iha kada munisípiu iha ona estrutura ne’ebé ho kapasidade téknika no mós kapasidade  hatene kumpre didi’ak regra sira ne’e hodi ita bele dehan bele hili no halo eleisaun uluk kona-bá autoridade governu lokál nian,” Primeiru-Ministru Kay Rala Xanana Gusmão ba jornalista sira.

Antes ne’e, IX Governu Konstitusionál liu husi reuniaun Konsellu Ministru, Kuarta (15/01/2025), aprova  ezekusaun Estratéjia Desentralizasaun Administrativa (EDA) no Instalasaun órgaun reprezentativu podér lokál 2025-2028 nian ne’ebé aprezenta husi Ministru Administrasaun Estatál (MAE), Tomás do Rosário Cabral.

Rezolusaun Governu ida-ne’e estabelese planu anuál sira, hosi 2025 to’o 2028, ne’ebé inklui instalasaun servisu Balkaun Úniku iha territóriu nasionál tomak, reforsu institusionál autoridade munisípiu sira nian, regulamentu lei sira ne’ebé relasiona ho podér lokál no atualizasaun baze-dadus resenseamentu eleitorál nian. Iha etapa sira tuirmai, sei promove kriasaun kondisaun sira hodi hala’o eleisaun munisipál, kapasitasaun ba prezidente munisipál eleitu sira no avaliasaun ba progresu desentralizasaun nian.

“Koordenasaun ba ezekusaun estratéjia sei sai hanesan responsabilidade Ministériu Administrasaun Estatál nian, ne’ebé tenke aprezenta relatóriu semestrál kona-ba progresu ne’ebé alkansa ona no dezafiu sira ne’ebé hasoru, hodi garante kontinuidade no efikásia prosesu nian.” Hatutan.com sita komunikadu.

Rezolusaun ida-ne’e revoga Rezolusaun Governu anteriór nú. 45/2020, loron 9 fulan-Dezembru, no tama iha vigór iha loron ida hafoin nia publikasaun.

Jornalista: Vito Salvadór