Ministériu Saúde Sei Kompras Produtu Medikamentu Item 391

Hatutan.com, (17 Janeiru 2025), Díli—Ministériu Saúde liuhosi Diresaun Nasionál Farmasia no Produtu Mediku (DNFPM) prepara ona lista kuantifikasaun ba kompras produtu medikamentu tinan 2025 nian.

Estoke ai-moruk iha armazén INFPM. Foto/dok.Tome da Silva

Diretór  DNFPM, Delfim Ferreira, Sesta (17/01/2025), iha nia Palásiu da Sinzas, klarifika katak,  lista ne’e bazeia ba lista medikamentus nasionál ne’ebé regularmente uja iha fasilidade saúde sira .

“Lista foun ne’e provolta 396 item ba produtu medikamentus deit, fora husi lista konsumaveis, ita prepara hela  sei submete semana oin ba Ministra Saúde, Élia António de Araújo dos Reis Amaral hodi aprova, nune bele kanaliza ba Institu Nasionál Farmásia no Produtu Medikamentu (INFPM) hosi bele prosesu ba aprovizionamentu,” Delfim Fereirra informa ba jornalista sira.

Delfim Ferreira haktuir kona-bá estoke konsumaveis laiha mudansa, sei nafatin hanesan tinan kotuk, nune’e lista ne’ebé mak DNFPM prepara la’ós ba kompras item espesialista deit, maibé ba kategoria hotu-hotu.

Kona-bá pedidu husi ospitál ka sentru saúde sira, nia esplika, depende ba nivel utilizasaun, ospitál iha nia lista propriu, sentru saúde mos iha  lista propriu. Ezemplu, ospitál iha item 200-liu no  sentru saúde iha  item 182  ne’ebé tenke iha lista.

Jornalista: Leopoldina de Carvalho