Ministru Tomas Cabral Enkamiña Pedidu Renunsia Kargu PAM Díli ba PM Xanana

Hatutan.com, (28 Janeiru 2025), Díli—Ministru Administrasaun Estatál (MAE), Tomas do Rosário Cabral, simu ona pedidu renunsia kargu Prezidente Autoridade Munisípiu (PAM) Díli, Gregório Saldanha “Mouris”  no enkamiña ona ba Primeiru-Ministru (PM), Kay Rala Xanana Gusmão atu bele foti desizaun.

Lee Mós: Irregularidade Administrativu no Finansas, Baze ba Gregório Rezigna An hosi PAM Díli

Karta resposta Ministru MAE Tomas do Rosário Cabral nian ba PAM Díli, Gregório Saldanha. Foto/Dok.MAE

Sita hosi karta resposta ne’ebé Ministru Administrasaun Estatál (MAE), Tomas do Rosário Cabral ne’ebé haruka ba PAM Díli, Gregório Saldanha “Mouris” ho asuntu  “Resposta ba karta ho referénsia nú 16/PAM-DILI/MAE/I/2025, 13 Janeiru 2025,  katak nia parte nu’udár Ministru MAE simu ona karta ho referénsia data 13 fulan-Janeiru 2025, ne’ebé Gregório Saldanha aprezenta formalmente pedidu ezonerasaun hosi funsaun PAM Díli.

Tuir mai Hatutan.com  publika kompletu konteúdu karta resposta hosi Ministru MAE, Tomas do Rosário Cabral ne’ebé  asesu hosi konta ofisiál Facebook Ministério Administração Estatal;

“….Sr. Prezidente,

Ha’u hato’o ha’u-nia kumprimentus

Ho ónra boot atu rekoñese simu karta ho referénsia iha leten, ho data 13 Janeiru 2025, ne’ebé Sua Exelénsia aprezenta formalmente pedidu ezonerasaun husi funsaun Prezidente Autoridade Munisipál Dili nian.

Kona-ba matéria ne’ebé espoin, ha’u tenke informa katak, tuir dispozisaun nú 1 artigu 21, husi Dekretu-Lei nú 3/2016, loron 16 fulan-marsu, ne’ebé re publika husi Dekretu-Lei nú. 84/2023, loron 23 fulan-novembru, kompeténsia atu deside ezonerasaun ba Prezidente Autoridade Munisipál sira eskluzivu ba Sua Exelénsia Primeiru-Ministru.

Tanba ne’e, ha’u sei hato’o pedidu ne’ebé Sua Exelénsia hato’o ba konsiderasaun superiór hosi Sua Exelénsia, Primeiru-Ministru, atu nune’e bele sujeita ba análize no desizaun, hanesan preve espresamente iha alínea h) hosi nú 2 hosi artigu 4-A, Dekretu-Lei nú 3/2016, loron 16 fulan-marsu, no republika husi Dekretu-Lei nú. 84/2023, loron 23 fulan-novembru.

 Iha loron hanesan Ministru Administrasaun Estatal enkamiña mós pedidu renunsia hosi kargu Prezidente Autoridade Munisípiu Dili ba S.E Primeiru Ministru, hodi bele tetu no foti desizaun tuir baze legál ne’ebé vigora, no S.E Primeiru Ministru despacho iha loron 14 Janeiru 2025 “Aprovo!

 “O MAE deve ver a melhor forma de propôr uma nova proposta de nomeação, que corresponde às necessidades da gestão da Capital! Entretanto o MAE, deve propôr uma substituição temporária do PAM, que não deve ultrapassar 30 dias”.

 Ho informasaun sira mensiona iha leten, mak husi biban ida ne’e, hakarak aprezenta ba públiku kona-bá lala’ok lolos husi rezignasaun Prezidente Autoridade Munisipiu Dili sesante Senhor Gregorio da Cunha Saldanha, tanba ne’e, husu ba públiku atu labele konsumu informasaun Falsu ne’ebé oras ne’e espalla iha Media Sosial.

DILI, 28 Janeiru 2025..”

Opiniaun sira hosi Bankada PLP, FRETILIN ho CNRT  

Parlamentu Nasionál liuhosi Xefe Bankada PLP, Maria Angelina Sarmento louva ho desizaun Prezidenti Autoridade Munisipíu (PAM), Díli, Gregório Saldanha ne’ebé rejigna an husi ninia kargu nu’udár PAM Dilí.

“Primeiru ha’u hakarak louva ho Prezidenti Autoridade Munisipíu  (PAM)  Díli nia aktu ida rejignasaun, tanba nia mai husi background ema ne’ebé mak moris hamutuk ho ema terus na’in sira, nia mós ema ne’ebé voz ativa ko’alia kona-bá violasaun direitu umanu ne’ebé akontese iha pasadu,” Deputada Maria Angelina Sarmento hateten bá Jornalista sira iha PN.

Reprezentante Povu ne’e haktuir PAM Dilí  ema ne’ebé mak uluk hasoru situasaun difisil no luta hasoru direitu umanu iha tempu funu  ida-ne’e nia abut  metin ona, nia haree injustisa nia konsiénsia ne’e akuza bei-beik nia labele troka kargu ho prinsipíu ida hakarak defende povu ki’ik no povu ki’ak.

“Ha’u hanesan reprezentante povu apresia bá Prezidenti Autoridade Munisípiu Díli  nian korajen no previdade para hasoru injustisa liuhosi rejigna an husi nia  kargu,” Deputada Angelina Sarmento hateten.

Iha fatin hanesan membru PN hosi Bankada FRETILIN, Joaquin dos Santos hateten Prezidenti Autoridade ne’e iha sira nia  kompeténsia rasik atu jere munisípiu ida no jere kompeténsia kona-bá dezemvolvimentu Munisípiu nian liga ho ekonomia, dezemvolvimentu no direitu ema nian.

“Sira nian kompeténsia ne’e lei mak fó, agora relasiona ho PAM Díli rejigna an ne’e tanba nia sente katák nia laiha kompeténsia ka nia kompeténsia ne’e nia labele uza, Governu sentrál foti tiha liuhosi SEATOU mak implementa fali,’ Deputadu Joaquin dos Santos hateten.

Nia hatutan  tuir loloos halo separasaun podér no kompeténsia Prezidenti Autoridade Munisipíu no Governu sentrál, no labele halo kna’ar ida hodi hamosu konflitu kompeténsia.

Iha sorin seluk membru PN hosi Bankada CNRT Natalino dos Santos hateten, ne’e demokrasia no PAM nian direitu, maibé nu’udár ema patriota ida enkoraja nafatin hasoru dezafiu no problema sira ne’e normal.

“Ha’u enkoraja nafatin para prosesu tomak, tanba nia hetan fiar husi IX Governu konstituisionál ne’ebé lidera husi Primeiru-Ministru Kay Rala Xanana Gusmão ne’ebé fó nafatin konfiansa bá asuwain sira,” Deputadu Natalino dos Santos hateten.

Iha fatin hanesan Vise-Ministru Asuntu Parlamentár Adérito da Costa Hugo la fó komentáriu kle’an liu hodi dehan de’it nu’udár sidadaun ida Prezidenti Autoridade Munisípiu Díli, Gregório Saldanha  iha diretu tomak deside atu la kontinua kargu ne’e.

Jornalista Estajiária : Zita Menezes