Embaixadora Filipina Anne A Pádua Entrega Karta Kredénsial bá Prezidente Repúblika

Hatutan.com (30 Janeiru 2025), Díli- Embaixadora Filipina mai Timor-Leste, Anne A Pádua, Kinta (30/01/2025), entrega   karta Kredensiál bá Prezidente Repúblika, José Ramos-Horta,  hodi hahú nia servisu diplomátiku iha Timor-Leste.

Embaixadora Filipina mai Timor-Leste, Anne A Pádua, entrega karta Kredensiál bá Prezidente Repúblika, José Ramos-Horta, Kinta (30/01/2025). Foto/Tome da Silva

Vise-Ministra Asuntu ASEAN,  Milena Rangel ne’ebé akompaña serimónia entrega karta kredensial ne’ebê hala’o iha Palásiu Prezidensiál, Díli, hateten Embaixadora Filipina mai Timor-Leste, Anne A Pádua, komesa nia servisu  husi loron ne’e durante tinan-tolu nu’udár embaixadora Filipina nian iha Timor-Leste.

“Iha enkontru bilaterál entre Prezidente Repúblika, José Ramos-Horta  ho Embaixadora Anne A. Pádua, ko’alia kona-bá ita-nia kooperasaun bilaterál ne’ebé eziste entre nasaun-rua no ita nian adezaun bá ASEAN,” Vise-Ministra Milena Rangel hateten.

Kooperasaun ne’ebé ezistente hanesan Filipina  apoiu bá Timor-Leste liuliu iha setór edukasaun no mós saúde. Estudante lubuk ida ne’ebé agora daudaun hala’o sira nian estudu iha Filipina no mós iha parte seluk Fundu Dezenvolvimentu Kapitál Umanu (FDCH) ne’ebé mak haruka ona estudante lubuk ida bá eskola iha Universidade  iha Filipina.

Eziste mós kooperasaun bolu katák Technical Cooperation ne’ebé ikus liu ita halo diálogu ho sira iha tinan balu bá kotuk, mais agora hanoin atu reativa fila-fali diálogu ida-ne’e Technical Cooperation entre Timor-Leste ho Filipina haree fila-fali kooperasaun ne’ebé mak ezistente

Jornalista Estajiária: Zita Menezes