PM Xanana Garante Hametin Sistema Ezekusaun OJE 2025 ho Kualidade

Hatutan.com, (30 Janeiru 2025), Díli- Primeiru-Ministru (PM), Kay Rala Xanana Gusmão, garante katak IX Governu Konstitusionál sei hametin sistema ezekusaun Orsamentu Jeral Estadu (OJE) 2025 ho kualidade.

Lee Mós: Xanana Promete OJE 2025 Benefisia Povu

PM Xanana Gusmão. Foto/Tome da Silva

PM Xanana Gusmão afirma asuntu ne’e liuhosi enkontru semanál ho Prezidente Repúblika, José Ramos-Horta, Kinta (30/01/2025) iha Palásiu Prezidensiál. Nia   hateten durante semana ida-ne’e Governu bá  responde kona-bá Konta Jerál Estadu 2023. IX Governu haree de’it bá hosi loron 01 fulan-Jullu to’o loron 31 fulan-Dezembru  2023, mais haree bá Konta Jerál Estadu buat barak ne’ebé mak lakon, kalén ne’ebé mak lakon, kalén ne’ebé mak sosa bara-barak buat sira ne’e ida la mosu-mosu mais la buat ida liu tiha ona.

“Ha’u mós informa bá Prezidente Repúblika tinan ida-ne’e ami sei haka’as aan atu hametin sistema ezekusaun orsamentu, mais ezekusaun ho kualidade, la’ós halo de’it, halo de’it, ne’e duni mak Prezidente ko’alia kona-bá husi li’ur ha’u mós ko’alia uitoan kona-bá buat ruma  husi li’ur, buat ne’ebé ha’u lalika fó sai,” PM Xanana Gusmão hateten ba jornalista sira.

“Ha’u informa bá Prezidente Repúblika problema udan, estraga fatin barak, liuliu ita nian mota ne’ebé ita la kontrola. Ita halo tiha iha ne’e mota lori fali fatuk mai taka tiha iha ne’e bá fali sobu  iha sorin,” nia tenik.

Jornalista Estajiária: Zita Menezes