KHUNTO husu Governu Servisu Hamutuk Serbí Povu ho Dignu

Hatutan.com, (04 Fevereiru 2025), Díli-Deklarasaun politiká Bankada KHUNTO ne’ebé hato’o iha plenária Parlamentu Nasionál (PN), Tersa (04/02/2025),   husu IX Governu Konstitusionál atu servisu hamutuk ho entidade hotu hosi serbí povu ho dignu.

Lee Mós: KHUNTO Fó Hanoin Gasta Osan ho Kuidadu, OJE 2025 $15,867,337 bá Vise-PM Asuntu Ekonómiku Pasa

Xefe Bankada KHUNTO, António Verdial Foto/Dok.Média PN.

Xefe Bankada KHUNTO, António Verdial deafirma deklarasaun polítika Bankada KHUNTO nian ne’e   ho objetivu atu hafanun Governu, atu nune’e ,bele rona no tau matan ba ezijénsia husi espetativa sosiedade Timor-Leste ninian.

“Ita nian nasaun presiza governu ida ne’ebé forte no estabel, ne’ebé bele oferese lideransa ne’ebé efikáz. Aplauda bá matenek povu Timor-Leste, ne’ebé iha vontade husi estabilidade, onestidade no dezenvolvimentu iha Timor-Leste. Ne’ebé buat ida hanaran Nepotismu, Koluzaun no Korupsan, labele iha fatin,” António Verdial de Sousa, hateten.

Bankada KHUNTO nia esperansa katák hamutuk estimula debate ne’ebé saudável hodi hamosu rezultadu ne’ebé pozitivu. Promosaun Governu ida ne’ebé di’ak, presiza Parlamentu ida ne’ebé bele efetiva, hala’o funsaun tolu ne’ebé importante maka hanesan, reprezentasaun, superviziona bá orgaun ezekutiva no elaborasaun lei.

“Ita nian kapasidade hodi kontrola gastu públika, hodi fó asisténsia ne’ebé dí’ak bá ita nian povu. Ita nian povu hein atu ita ajuda sira. Ita nian povu hein hela ho esperansa atu ita ajuda, hadí’a ekónomia fornese fatin kampu serbisu bá hirak ne’ebé sei la hetan servisu, hasa’e asesu bá Edukasaun, asisténsia Médika, Infraestrutura no zeralmente fó bá sira esperansa,” Nia afirma.

Bankada KHUNTO hein katák Bankada hotu-hotu  hamutuk iha Uma Fukun PN servisu maka’as hodi bele rezulta lei ne’ebé dí’ak hodi suporta IX Governu Konstitusional, atu nune’e mandatu bele hela hó liafuan Susesu.

“Povu Timor-Leste fó mandatu ida mai ita ne’ebé klaru. Sira hakarak haree Timor-Leste ida ne’ebé moris vibrante, Dinamis ka Dinámika no Prósperu. Sira hakarak Timor-Leste ida ne’ebé halo ema hotu nakonu ho orgullu no sentimentu respeitu husi komunidade internasionál. Nakonu ho esperansa no esperansa, povu hein rezultadu ne’ebe lais no lalais,” Deputadu António Verdial tenik.

Iha sorin seluk Vise-Ministru Asuntu Parlamentár Adérito Hugo da Costa hateten,  Governu mós aguarda hela intervenzaun Bankada sira nian kona-bá intesidade debate saudavél Bankada sira bele aprezenta kalendáriu mensál kona-bá oinsá atu debate ho Governu no Ministériu ne’ebé mak presiza atu halo debate hodi servi povu ho di’ak liután.

Jornalista Estajiária : Zita Menezes