PLP Konsidera Projetu Jardín iha Sengol Kansela Tanba Kustu Ki’ik Atu “Haknauk”

Hatutan.com (11 Fevereiru 2025), Díli-Bankada Parlamentál PLP konsidera desizaun Governu nian hodi kansela projetu jardín iha espasu públiku Bidau-Sengol nian tanba haree katak kustu ki’ik liu atu “haknauk” tanba ne’e muda ba halo fali estrada atu hetan lukru ho valor boot.  

Lee Mós: Governu Kansela Halo Jardin iha Sengol

Xefe Bankada PLP iha PN, Maria Angelina Sarmento. Foto/Tome da Silva.

Liuhosi deklarasaun polítika iha plenária Parlamentu Nasionál (PN), Tersa (11/02/2025), Xefe Bankada PLP, Maria Angelina Sarmento aprezenta preokupasaun PLP nian liga ho desiaun Governu nian ne’ebé kansela projetu jardín atu estabelese iha Bidau-Sengol muda fali ba projetu alargamentu estrada pista rua.

“Iha inísiu ansi loos obriga ema sai husi iha ne’ebá, tanba dehan atu halo jardín, depois la’o to’o dalan klaran jardín sai fali bá estrada. Pergunta boot seraké kompañia ho Governu halo konta tuun-konta sa’e, la hetan   lukru  (untung) entaun bá fali estrada, tanba estrada ne’e kustu boot liu no hetan  lukru  untung boot loos ka lae,” Deputada Maria Angelina Sarmento hateten.

Nia hateten estadu no  Governante sira povu hili mak atu ukun  ka kompañia sira fó han partidu mak atu ukun rai ida-ne’e. Ida-ne’e hatudu katák estadu ida-ne’e laiha tiha moral.

“Laiha ona integridade atu ukun no kompañia sira ne’ebé mak iha kampaíña polítika  fó han partidu ne’e mak atu ukun fali orsamentu jerál estadu. Planu halo jardín hakerek iha OJE 2025 iha ka lae, no ha’u sei buka tuir iha livru sira iha OJE 2025 ne’e Ministériu Obras Públiku prevé iha ne’ebá ka lae?,” Deputada  Maria Angelina Sarmento afirma.

Iha fatin hanesan Vise-Ministru Asuntu Parlamentár, Adérito Hugo da Costa reprezenta IX Governu Konstitusionál iha PN hatán kedas hodi klarifika katak  depois haree iha planu seluk mosu Governu bele introdús la’ós krime, sorte halo mudansa vizaun tiha bá estrada duké kontinua de’it ho jardín depois enfrenta hela estasionamentu bá transporte públiku no privadu  sira.

Hanesan iha Bidau-Sengol ne’e atividade komersiál iha parte ne’ebá ne’e barak tebes, laiha fatin bá estasionamentu sempre iha tráfiku no empede  asesu ambulánsia  bá Ospitál Nasionál Guido Valadares (HNGV).

“Iha kontextu ne’e mak haree katák duke jardín di’ak liu halo alargamanetu bá estrada ho liña  ka pista rua depois fasilita transporte públiku bá iha ne’ebá,” vise-Ministru Adérito Hugo argumenta.

Jornalista Estajiária: Zita Menezes