Fiskalizasaun Komisaun E-PN Identifika Estrada Barak Sei Aat

Hatutan.com, (18 Fevereiru 2025) Díli– Parlamentu Nasionál liuhosi fiskalizasaun  komisaun E ne’ebé trata asuntu Infraestrutura identifika estrada barak iha territóriu Timor-Leste sei iha kondisaun aat.

Kondisaun Estrada hosi Gleno bá Postu Administrativu Letefoho, tun to’o Postu Administrativu Atsabe aat tebetebes. Foto/Dok.Cipriano Colo.

Prezidente Komisaun E ne’ebé trata asuntu Infraestrutura Marcos Xavier hateten, fiskalizasaun komisaun E nian nota katák estrada barak mak aat liuliu  haree trosu sira iha Ermera husi Gleno bá Ermera no Letefoho sai Atsabe to’o Bobonaru Estrada  aat tebetebes.

Prezidente komisaun E ne’e afirma estrada sira ne’e iha ona planu, agora prosesu hela dezeñu BoQ mós prontu hotu ona hein atu halo konkursu públiku (tenderizasaun), nune’e fiar katák iha tinan ida-ne’e obra sira ne’e bele la’o ona.

“Konkursu públiku ne’ebé agora iha Komisaun Nasionál Aprovizionamentu (CAN, portugés), ne’e hamutuk projetu 20. Sé projetu 20 ne’e mak la’o hotu ita haree katák estrada sira ne’e book daudaun ona, maibé neineik tanba prosesu sira ne’e tenke la’o rekizitu legal sira ne’ebé kontempladu iha Lei Rejime Juridiku Aprovizionamentu (RJA),” Deputadu Marcos Xavier hateten iha PN, Tersa (18/02/2025).

Nia haktuir kuaze Governu hotu ukun ne’e estrada halo neineik, tanba kada tinan Governu aprová osan la’ós bá de’it estrada, maibé bá mós asuntu Saúde, Agrikultura Turizmu no selu-seluk tán.  Nune’e tinan ida-ne’e sei haree bá estrada sira kapitál Munisípiu ezemplu hanesan iha Lospalos, Maliana no Baucau no fiar katák molok mandatu IX Governu nian remata povu mós bele haree dezenvolvimentu iha rai-laran.

Kompañia Internasionál Kaer Projetu Lentu

Prezidente Komisaun E-PN, Marcos Xavier, haktuir mós kompañia Internasionál sira manan tiha obra boot, ezemplu hanesan iha Maliana vila, estrada ne’e kle’ur  tinan ida ho balu ona, projetu ne’e seidauk haree nian progresu no foin atinje 13%.

Nia husu Ministériu Obras Públiku no Ajénsia Dezenvolvimentu Nasionál  (ADN) akompaña nafatin kompañia  sira para oinsá aselera  obra sira ne’e.

Jornalista Estajiária : Zita Menezes