Governador BCTL Aprezenta ba Konsellu Ministru Relatóriu Jestaun Operasionál Fundu Petrolíferu

Hatutan.com, (26 Fevereiru 2025), Díli– Governadór Banku Sentrál Timor-Leste (BCTL-portugés), Helder Lopes,  Kuarta (26/02/2025), aprezenta ba Konsellu Ministrus relatóriu ida kona-ba jestaun operasionál Fundu Petrolíferu nian.

Lee Mós: Relatóriu BCTL: Fundu Petroliferu Billiaun $18,27 no Reseita Millaun $11,82

Governadór BCTL, Helder Lopes. Foto/Tome da Silva

Komunikadu ne’ebé Hatutan.com asesu husi Gabinete Ministru Prezidénsia Konsellu Ministrus haktuir  aprezentasaun ne’e ko’alia kona-bá dezempeñu Fundu Petrolíferu iha tinan 2024, inklui balansu fundu nian, reseita ne’ebé hetan no estratéjia investimentu. Analiza mós alokasaun portafóliu, retornu investimentu, levantamentu sira ne’ebé halo no impaktu globál hosi jestaun fundu.

Fundu Petrolíferu nia estratéjia investimentu define hosi objetivu klaru sira ne’ebé hatuur iha lejizlasaun nasionál, hodi garante katak reseita sira hosi esplorasaun petróleu aplika tuir dalan ida ne’ebé garante benefísiu sustentável ba jerasaun atuál no aban-bainrua nian.

Reuniaun Konsellu Ministru ne’e mós aprova Projetu Rezolusaun Governu ne’ebé aprezenta hosi Prezidénsia Konsellu Ministrus no Komisaun Funsaun Públika, ne’ebé estabelese vaga ba promosaun tuir antiguidade pesoál ne’ebé integra iha karreira Rejime Jerál Administrasaun Públika ba tinan 2025.

Husi totál vaga promosaun 3540 ne’ebé estabelese hosi Rezolusaun Governu ida-ne’e, 60 aloka ba kategoria Tékniku Superiór – Grau A, 223 ba Tékniku Superiór – Grau B, 561 ba Tékniku Profisionál – Grau C, 965 ba Tékniku Profisionál – Grau D, 1051 ba Tékniku Administrativu – Grau E no 680 ba Asistente – Grau F.

Jornalista: Vito Salvadór