Polítika
PN Sei Reabertura Fali Kandidatu Na’in-Rua ba Conselho de Imprensa
Hatutan.com, (27 Fevereiru 2025), Díli– Parlamentu Nasionál sei reabertura fali kandidatu na’in-rua hosi Parlamentu Nasionál atu ba Conselho de Imprensa (CI) de Timor Leste.
Presidente Komisaun G PN, Armando dos Santos Lopes. Foto/Zita Menezes
Razaun PN halo fali reabertura tanba kandidatu na’in-rua ne’ebé propoin husi Bankada CNRT ho Bankada PD, Miguel Freitas Faluxai ho Benevides Correia Barros, ida rezigna aan ona.
Miguel Freitas Faluxai proponente husi Bankada CNRT liu hosi enkontru ho Komisaun G Parlamentu Nasionál ne’ebé trata asuntu Edukasaun, Joventude, Kultura no Sidadania, Kinta (27/02/2025), pronunsia nia rezignasaun tanba la disponivel atu reprezenta órgaun Estadu Parlamentu Nasionál ba iha órgaun reguladór komunikasaun sosiál ka Conselho de Imprensa (CI).
Prezidente Komisaun G PN, Deputadu Armando dos Santos Lopes hateten kandidatu bá membru Konsellu Imprensa Miguel Freitas Faluxai rezigna aan no Benevides Correia Barros iha enkontru ne’e la marka prezensa hodi halo audiénsia ho komisaun G.
Deputadu Armando dos Santos Lopes hateten, objetivu komisaun G halo audensia ho kandidatu CI husi orgaun soberania Parlamentu Nasionál atu direitamente rona esperiénsia husi kandidatu, katák atu tama bá iha CI ne’e tenke ema ne’ebé iha esperiénsia.
“Ami marka tempu tuku 8.40 dadeer atu halo audiénsia ho kandidatu primeiru Miguel Freitas Faluxai no ohin nia hasoru ami introdús katák nia laiha posibilidade atu kontinua no nia rezigna aan. Depois komisaun G hein fali kandidatu Benevides Correia Barros ne’e la marka prezensa no seim justifikasaun,” Deputadu Armando dos Santos bá jornalista sira iha PN.
Komisaun G sei halo fali relatóriu bá iha Prezidenti Parlamentu Nasionál (PPN) Maria Fernanda Lay no lori informasaun ne’e bá iha lidér Bankada hodi foti fali desizaun tuir mai.
Iha fatin hanesan kandidatu Miguel Freitas Faluxai hateten nia kandidatu husi Bankada Governu CNRT no PD nia parte simu konvite atu mai iha Komisaun G-PN ho razaun atu mai ko’alia kestaun kona-bá kandidatu ne’ebé mak atu bá iha CI.
“Ho kolega kandidatu Benevides Correia Barros ami rua mak atu reprezenta orgaun estadu Parlamentu Nasionál nian para bá iha CI, maibé ohin ha’u mai iha ne’e atu ko’alia ho komisaun G aprezenta ha’u nian aan no foti posizaun ida katák ha’u rezeita no laiha disponibilidade para atu bá iha CI,” Miguel Freitas Faluxai hateten.
Tuir nia, CI ne’e tenke ema ida ne’ebé mak iha indepedénsia mak bele bá, nia deside rejigna aan tanba nia tama ona bá politikú mezmu uluk hala’o servisu profisionál hanesan jornalista.
“Pesoálmente ha’u rejigna aan husi kandidatu ida-ne’e tanba ha’u konsidera ha’u nian aan katák ha’u ema politikú, laiha ona objesaun para atu bá iha CI hala’o knar profisionál no independente,” Nia afirma.
Hosi sorin seluk, Benevides Correia Barros atuál membru CI ne’ebé Hatutan.com konfirma via telefónika hateten nia foin marka prezensa duni iha PN. Maibé tanba iha mist communications uitoan halo nia la konsege partisipa iha audiénsia ho Komisaun G PN.
“Ha’u foin dadeer ne’e ba duni PN tuir komunikasaun ne’ebé ha’u simu husi Komisaun G, maibé ha’u to’o ba iha PN liu ba sala enkontru Komisaun G nian dehan enkontru ne’e ha’u la bele tama. Nune’e, ha’u ba fali tuur iha Bankada PD nia fatin no bainhira ha’u sai mai hasoru fali Prezidente Komisaun G dehan katak enkontru hotu ona. Entaun ha’u foin halo ona justifikasaun ba iha prezidente Komisaun G. agora ha’u mós rona kolega Miguel Freitas Faluxai rejigana aan ona entaun PN tenke halo reabertura ba kandidatu PN nian atu ba CI ne’e,” Benevides Correia Barros hateten.
Lei Komunikasaun Sosiál Timor-Leste nian iha artigu 45 kona-bá kompozisaun membru CI nian iha númeru 1 haktuir;
- Reprezentante na’in-rua hili husi jornalista rasik, liuhusi eleisaun
- Reprezentante ida husi órgaun komunikasaun sosiál, ne’ebé hili liuhusi eleisaun
- Sidadaun na’in-rua, matenek iha esperiénsia profisionál ne’ebé kle’an liuliu kona-bá komunikasaun sosiál, husi sira na’in-rua ne’e, ida jurista ne’ebé hatudu husi Parlamentu Nasionál.
Jornalista Estajiária : Zita Menezes