Defeza & Seguransa
Prezidente Repúblika Konsidera PNTL iha Progresu Dezenvolvimentu Di’ak
Hatutan.com, (11 Marsu 2025), Díli- Prezidente Repúblika (PR), José Ramos-Horta hateten Polísia Nasionál Timor-Leste (PNTL) hatudu progresu no dezenvolvimentu institusionál ne’ebé di’ak.
Prezidente Repúblika, José Ramos-Horta hato’o palestra iha serímonia aniversáriu PNTL, Tersa (11/03/2025). Foto/Elio dos Santos da Costa
Prezidente Repúblika (PR), José Ramos-Horta hato’o lia hirak ne’e hodi kontratuál instituisaun PNTL ne’ebé selebra aniversáriu ba dala-XXV ne’ebé hala’o ho semináriu iha akademia Polisia, Comoro, Tersa (11/03/2025).
“Ha’u halo avaliasaun, observasaun no ha’u bele hatete loron ida ne’e parabéns ba PNTL, dezde 1999 to’o ohin haksoit boot ba oin. Iha problema balun, maibé ne’e problema ne’e governu haree, atuál ministru, Komandu Jerál haree oinsá mak bele hadi’a kondisaun, promosaun no formasaun,” Ramos-Horta hateten.
Xefe Estadu fó parabéns ba polísia, no obrigadu ba sira nia servisu ne’ebé di’ak, fó ba posibilidade bara, komunidade sira hakmatek, no garante seguransa ba populasaun sira iha bairu-bairu.
Biban hanesan Ministru Prezidénsia Konsellu Ministru, Hermenegildo “Agio” Pereira hateten, PNTL nu’udar instituisaun estadu nian, ho responsabilidade boot tau matan ba populasaun, loron hitu oras 24 kada responsabilidade boot tebe-tebes.
“Ha’u felisita Ministru Interiór ho organizadór sira hotu, tanba dehan hamutuk hametin konfiansa. Ha’u dehan konfiansa populasaun ne’e ba PNTL ne’e krusiál tebe-tebes, atu PNTL bele iha lejitimidade atu uza forsa atu serbí nasaun, serbí bem komún. La ho konfiansa populasaun, komunidade nian, PNTL bele lakon lejitimidade,” Ministru Agio Pereira hateten.
Tinan 25 kotuk PNTL mosu situasaun ida komplikadu tebe-tebes, tanba iha tranzisaun, tenke kria ona instituisaun ida katak serbí populasaun, presiza tempu atu manan konfiansa husi populasaun, komunidade ninian.
PNTL ho nia lideransa polítika nasionál konsege duni aguenta ho situasaun difisil, kompleksu tebe-tebes, inklui iha situasaun krize 2006 masakre iha kuartel jenerál polísia, mas PNTL nia irarkia fó apoiu polítiku kontinua determina.
Ministru Interiór, Francisco da Costa Guterres informa, tinan 25 baibain bolu karik dehan tinan osan mutin ninian, ohin Prezidente Repúblika mai hato’o kestaun importante ida ba hotu-hotu katak povu nia konfiansa ne’e mak fatór determinante atu PNTL hala’o ninia servisu.
“Ha’u hanoin tinan 25 mak ida ne’e, oinsá PNTL buka dezempeña nia papél ho didi’ak, hala’o nia servisu ho didi’ak uza, ho elementu prinsipál rua, disiplina ho obedese ba ierarkia atu bele tane nafatin konfiansa ne’ebé povu hela ba sira ne’e,” Francisco da Costa Guterres tenik.
Polísia iha kestaun barak, tenke hadi’a barak atu bele konsolida instituisaun ne’e rasik, primeiru kestaun infraestrutura, mas primeiru oinsá hadi’a tiha lai sira nia kestaun legál sira ne’e.
Tenke reforma membru PNTL ne’ebé idade 70 ba leten
Prezidente Repúblika José Ramos-Horta mos husu atu oinsa mak Ministériu Interiór hamutuk ho komandu PNTL tau mos prióridade reforma ba membru sira ne’ebé atinze ona idade 70 ba leten.
“Ha’u hanoin tenke reforma ba polísia sira idade 70, tanba polísia ne’e oin seluk, polísia ne’e klaru balun servisu iha kuartel hanesan ema sivil baibain, mas polísia ne’e responsabilidade seluk ida, bainhira idade 70 labele iha loron manas ba mai. Tan ne’e Prezidente Repúblika entrega 100% husik ba governu mak iha kompeténsia, ba iha ministru ne’e atu hola responsabilidade no papél 100% ba ida ne’e.” Tenik Ramos-Horta.
Xefe estadu hatutan ministru iha estudu bo’ot esperiénsia, nia hatene polísia oinsá buat sira ne’e. Esperiénsia tinan 22 ona saida mak sala, saida mak loos entaun husik sira hadia ba, nune’e fulan ruma nia laran, tinan ida haree buat ne’ebé presiza reforma sira implementa daudaun ona.
Ministru Interiór Francisco da Costa Guterres hateten Foin lalais governu aprova estatutu polísia ne’ebé propoin ba governu aprova hodi responde ba problema lubuk boot ida ne’ebé PNTL infrenta durante ne’e.
Iha kestaun promosaun, tanba ne’e atu responde agora, ita responde iha fulan ida nia laran, liu husi artigu 155 ne’e promosaun tranzitoriu atu rezolve problema hira kedas.
Problema ne’ebé durante ne’e husik hela iha PNTL nia laran liu husi promosaun rezolve, kestaun promosaun atividade, promosaun tanba Veteranu, promosaun tanba uluk xefia, promosaun tanba krize sira ne’e hotu.
“Tanba balun idade atu ba ona reforma, prepara sira atu ba reforma, mezmu sira reforma sira kontinua ligasaun ho PNTL, hodi bele ajuda polísia nafatin atu hala’o sira nia kna’ar iha fatin ne’ebé sira hela ba ne’e. Oinsá atu ko’alia ba joven sira, muda sira nia mentalidade, oinsá atu bele ajuda PNTL atu kria hakmatek iha fatin ne’ebé sira hela ba ne’e mak sira nia papél importante ida bainhira sira reforma.” Nia hakotu.
Jornalista: Elio dos Santos