Ministru Miguel Manetelu Laiha Koñesimentu Bá Kazu Hapara Tripulante Timoroan Na’in-ualu

Hatutan.com, (19 Marsu 2025), Díli– Ministru Transporte no Komunikasaun (MTK), Miguel Marques Gonçalves Manetelu, la hatene no laiha koñesimentu kona-bá desizaun  Autoridade Portuáriu Timor-Leste  Institutu Públiku (APORTIL,I.P) hapara ka la extende kontratu   tripulante Timoroan na’in-ualu (8) iha Ró Berlin Ramelau no Nakroma.

Lee Mós: Bankada PLP Preokupa ho Kustu Manutensaun Ró Berlin Nakroma $785,000

Ministru Transporte no Komunikasaun, Miguel Marques Gonçalves Manetelu. Foto/Zita Menezes

“‘Ministériu MTK la hapara ema (tripulante) sira servisu iha ne’ebá, ne’e sira mak hatama no sira mak hasai, sé mak hapara ema, sira iha autónomia finanseiru no administrativa no patrimonial, ne’ebé sira mak jere,“ Ministru Miguel Manetelu haktuir hodi hatán jornalista sira iha Palásiu Governu, Kuarta (19/03/2025).

Membru Governu ne’e afirma nia parte  to’o ohin loron seidauk hatene kauza hapara tripulante Timoroan na’in-ualu tán ne’e sei hein relatóriu husi APORTIL.

“Osan la to’o mak hasai ema ka halo nusa tanba saida ne’e ha’u lahatene, ha’u presiza hetan relatóriu ne’e tanba to’o ohin loron ha’u seidauk hetan relatóriu entaun ha’u seidauk bele halo komentáriu,” Miguel Manetelu tenik.

Antes ne’e, Xefe Bankada PLP iha Parlamentu Nasionál,  Maria Angelina Sarmento iha nia intervensaun iha plenária hato’o nia preokupasaun kona-bá tripulante na’in-ualu ne’ebé durante ne’e servisu iha Ró Berlin Nakroma no Ramelau hapara hotu no  rekruta hotu fali tripulante sira husi  Indonézia mak mai kaer Ró sira ne’e.

“Iha de’it Timoroan ida ka rua mak tama hamutuk ho tripulante Indonézia no Timoroan na’in-ualu (8) ne’e sira hapara hotu sira nia kontratu, ne’e pergunta tanba saida?” Deputada Maria Angelina Sarmento lamenta.

Nia dehan durante ne’e rekrutamentu bá ema sira servisu iha Ró Berlin Nakroma ne’e rekrutamentu feixadu no la aberta bá públiku, tripulante Timoroan sira dehan sé fó sai rekrutamentu ne’e aberta karik sira mós prontu atu konkorre.

Jornalista Estajiária: Zita Menezes