Justisa & Krime
Justisa Timor-Leste Deside La Estradita Fujitivu INTERPOL Arnolfo Teves Jr
Hatutan.com, (21 Marsu 2025), Díli- Justisa Timor-Leste liuhusi Supremu Tribunál Justisa (STJ) deside la halo estradisaun bá fujitivu Organizasaun Internasionál Polísia Kriminál (INTERPOL, sigla inglés) Arnolfo Teves Jr atu fila ba kumpre sentensa ne’ebé Tribunál Filipina hamonu ba nia.
Lee Mós: Horta Afirma Fujitivu Arnolfo Teves Jr La Prienxe Rekizitu Azíliu Polítika iha Timor-Leste
Fujitivu Arnolfo “Anie” Alipit Teves Jr. Foto/ GMA News Online
Hafoin Supremu Tribunál Justisa halo tiha análize ba rekursu ne’ebé hato’o husi defeza Arnolfo Teves Jr, Kuarta (20/05/2025), deside indefere pedidu estradisaun ne’ebé hato’o husi Governu Filipina hodi husu ba Governu Timor-Leste atu estradita Arnolfo Teves Jr, ho nune’e Arnolfo Teves Jr sei la hetan estradisaun.
José Ximenes, antigu Prokuradór Jerál Repúblika nu’udár Advogadu privadu ba fujitivu Arnolfo Teves Jr submete pedidu la halo estradisaun ba nia kliente ba Supremu Tribunál Justisa iha loron 15 fulan-Dezembru 2024, nune’e liu husi Plenária Juiz Supremu Tribunál Justisa ne’ebé kompostu husi Maria Natercia Gusmão (Relatora), António Helder Viana do Carmo (1 Adjuntu), no Edite Palmeira dos Reis (2 adjuntu) no bazeia ba faktu sira no tuir Konstituisaun RDTL artigu 35, kona-bá Estradisaun no espulsaun, iha númeru da-toluk ne’ebé hateten ho momoos katak labele iha estradisaun tan krime ida, bainhira estadu ne’ebé husu estradisaun fó kastigu mate-kotu ka kastigu to’o mate, ka iha tada nangis katak atu iha tortura ka tratamentu aat ka degradante ba ema ne’ebé hetan estradisaun.
Haree ba buat hirak ne’ebé temi tiha ona, Plenáriu Juíz sira Tribunál Rekursu nian deside, ho unanimidade, konsidera rekursu ne’ebé iha ho konsekuentemente, bazeia ba dispozisaun sira iha artigu 35.º númeru 3 husi Konstituisaun Repúblika Demokrátika Timor-Leste nian, rekuza pedidu estradisaun Arnolfo “Arnie” Alipit Teves Jr, hodi revoga desizaun ne’ebé apela.
PDHJ: Parte Hotu Respeita Desizaun Tribunál
Dokumentu Desizaun STJ nian la estradita Fujitivu Arnolfo Teves Jr. Foto/dok.Espesiál
Virgílio Guterres hateten parte hotu tenke respeita no sai baze desizaun Tribunál nian mak Artigu 35 Konstituisaun RDTL. Bainhira la hetan garantia hosi Estadu orijen extraditandu nian, katak extraditandu sei hetan prosesu julgamentu ne’ebé justu no la hetan pena perpétua no pena de morte, independentemente hodi krime nebe nia halo, Timor-Leste labele estradita duni.
Fó hanoin fali katak fujitivu red notice hosi INTERPOL ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.
Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli, tempu ne’ebá, deskonfia simu direta hosi asesór prinsipál Prezidente Repúblika nian tempu ne’ebá.
Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór Negru Oriental, Roel de Gamo hetan kapturasaun no detensaun hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.
Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.
Eis lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés) iha fulan-Fevereiru 2023. Notifikasaun red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.
Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.
Jornalista: Elio dos Santos