Timor-Leste Manifesta Solidariedade ho Povu Tailándia-Myanmar Ne’ebé Sofre Rai-Nakdoko

Hatutan.com, (29 Marsu 2025), Díli- Governu Repúblika Demokrátika Timor-Leste espresa konsternasaun no solidariedade ne’ebé maka’as ho Governu no Povu sira reinu Tailándia ho Myanmar nian, ne’ebé afeta maka’as hosi rai-nakdoko ho magnitude 7.7 hodi halo nakdoko rejiaun ne’e hodi hamosu vítima mortál, kanek no estragu materiál oioin.

Lee Mós: Rai-Nakdoko ho Magnitude 7.7 iha Myanmar-Tailándia Hamate Ema Na’in-26 no Hakanek Na’in-43

Rai-nakdoko iha Myanmar halo monu edifísiu sira iha Bangkok, Tailándia. Foto/DW

Komunikadu ba imprensa  husi Ministériu Prezidénsia Konsellu Ministrus ne’ebé Hatutan.com asesu revela  autoridade tailandeza sira konfirma ona, to’o agora, pelumenus ema na’in-tolu nia mate iha Bangkok, hafoin edifísiu ida ne’ebé sei konstroi hela monu, ho ema sanulu ne’ebé maka sei fó sai hanesan lakon.

Iha Myanmar, rai-nakdoko ne’e, ne’ebé nia episentru lokaliza besik sidade Mandalay, hamosu deklarasaun estadu emerjénsia nian iha rejiaun oioin nasaun nian.

Timor-Leste hamutuk iha sofrimentu povu maun-alin sira rejiaun ne’e nian no hato’o nia sentidas kondolénsias sinsera ba família vítima sira nian, hodi dezeja rekuperasaun lalais ba sira ne’ebé kanek no ba sira ne’ebé afetadu diretamente hosi kalamidade ne’e. Governu hamriik iha solidariedade ho esforsu emerjénsia no rekonstrusaun nian iha nasaun afetadu sira, hodi rekoñese reziliénsia no forsa hosi sira-nia populasaun iha tempu adversidade boot ida-ne’e.

Portavós Governu Konstitusionál IX nian, Ministru Prezidénsia Konsellu Ministru, Agio Pereira, hodi Governu tomak nia naran hato’o solidariedade.

“Solidariedade ho povu no Governu sira Tailándia ho Myanmar nian ne’ebé afetadu hosi katástrofe ida-ne’e,” Ministru Agio Pereira hateten iha komunikadu imprensa ne’e.

Governante ne’e hatutan tan katak iha tempu susar ida-ne’e, ami-nia hanoin hamutuk ho vítima sira no sira-nia família no ami rekoñese sira hotu ne’ebé komprometidu atu kontinua tulun komunidade sira ne’ebé afetada.

Jornalista: Elio dos Santos