01 Janeiru 2026, Reforma Funsionariu Públiku Sira ho Idade Tinan 65

Hatutan.com, (02 Abríl 2025), Díli– Reuniaun Konsellu Ministruv sira-nian, Kuarta (02/04/2025), iha Palásiu Governu, deside  halo alterasaun da-ruak bá lei n. 8/2004, loron 16 fulan-Juñu, ne’ebé aprova Estatutu Funsaun Públika, hodi estabelese limite tinan 65 nu’udar idade obrigatóriu hodi remata relasaun traballu funsionáriu públiku no ajentes Administrasaun Públika nian ne’ebé sei akontese automatikamente iha loron ne’ebé traballadór atinje idade refere.

Lee Mós: Governu ho CFP Avalia Prioridade ba Tinan 2025 iha Reforma Administrasaun Públika

Reuniaun Konsellu Ministru (KM). Foto/Dok.Elio dos Santos da Costa.

Konsellu Ministru aprova Projetu Dekretu-Lei ne’ebé aprezenta hosi Ministru Prezidénsia Konsellu Ministrus, Agio Pereira, no hosi Prezidente Komisaun Funsaun Públika, Agostinho Letêncio de Deus, ne’ebé ho uzu autorizasaun lejizlativa ne’ebé hetan hosi Lei n. 7/2024, loron 23 fulan-Outubru, halo alterasaun daruak ba Lei n. 8/2004, loron 16 fulan-Juñu, ne’ebé aprova Estatutu Funsaun Públika.

Komunikadu imprensa ne’ebé Hautan.com asesu haktuir medida ne’e hakarak atu promove joven sira bá kuadru Administrasaun Públika nian, garante renovasaun jerasionál no hadi’a kualidade no efisiénsia servisus ne’ebé presta bá populasaun.

Diploma ne’e determina mós katak Komisaun Funsaun Públika tenke notifika traballadór, ninia entidade empregadora no Seguransa Sosiál pelumenus loron 90 molok hakotu funsaun.

Iha situasaun sira ba interese públiku ne’ebé fundamenta ho loloos, no bainhira labele substitui imediata traballadór ne’e, sei posivel atu prolonga hodi hala’o funsaun, tuir akordu hamutuk, to’o tinan 68. Diploma ne’e hahú vigora iha loron 01 fulan-Janeiru tinan 2026.

Jornalista: Elio dos Santos da Costa