Desportu
Governu Suspende Atividade Arte-Marsiál no Husik KRAM Eziste Halo Fiskalizasaun
Hatutan.com, (04 Abríl 2025), Díli – IX Governu Konstitusionál kontinua suspende atividade arte-marsiál sira-nian, maibé la suspende atividade Komisaun Reguladora Arte-Marsiál (KRAM) atu bele halo fiskalizasaun.
Lee Mós: Governasaun Xanana Kontínua Suspende Atividade Arte-Marsiál To’o 31 Dezembru 2025
Ministru Juventude, Desportu Arte no Kultura (MJDAK), Nelio Isaac Sarmento. Foto/Lazaro Pereira Quefi
KRAM nia ezisténsia ne’e kontempla iha lei númeru 5/2017 hodi kontinua hakbesik ba organizasaun hotu-hotu halo sosializasaun no kontrolu kona-bá sira nia atividade.
Ministru Juventude, Desportu Arte no Kultura (MJDAK), Nelio Isaac Sarmento, Sesta (04/04/2025), hateten KRAM nia servisu mak hanesan órgaun reguladora ba arte-marsiál sira ne’ebe mak eziste iha Timor-Leste tanba ne’e atividade pratika arte-marsiál ho arte-rituál sira kontinua suspende maibé KRAM eziste nafatin hala’o nia funsaun.
“Atu taka ka la taka KRAM hari hosi lei númeru 5/20217 ne’ebé Parlamentu mak halo kona-bá armas brankas entaun KRAM mosu hosi lei ida armas brankas ne’e. Imi ko’alia katak atividade pratika arte-marsiál taka nusa la taka KRAM, labele taka duni KRAM tanba harii tuir lei. Suspensaun katak atividade sira labele hala’o hodi fó oportunidade ba KRAM atu halo fiskalizasaun, atu halo kontrolu no hakbesik ba organizasaun arte-marsiál ho arte-rituál hodi haree liu ba atividade ne’ebe mak relasiona ho desportu atu ko’alia ba malu kona-bá saida mak atu halo ba oin iha ámbitu desportu nian,” Ministru Nelio Isaac Sarmento hateten hodi responde Hatutan.com iha nia servisu fatin.
KRAM la taka tanba atu ko’alia ho arte-marsiál ho arte-rituál sira liga ho durante periodu suspensaun ne’e sira nia atividade kontinua halo treinu ka oinsá, treinu subar ka lae, tanba ne’e KRAM eziste atu halo servisu sira ne’e.
Iha rezolusaun ne’e Governu fó hela servisu ida ba KRAM atu halo fiskalizasaun ba GAM ho GAR nune’e mós kada fulan KRAM rasik tenke halo relatóriu ba governu hodi bele hatene kona-bá progresu ka evolusaun servisu sira la’o oinsá no saida mak arte-marsiàl ho arte-rituál sira-nia hakarak para governu bele hatene.
Ministru Nelio Isaac Sarmento fundamenta katak ho suspensaun atividade grupu arte-marsiál no arte-rituál sira, sosiedade no instituisaun Governu nian intende katak atividade arte-marsiál ne’e ba duni desportu tanba ne’e iha problema ruma mosu karik labele akuza katak ne’e arte-marsiál mak kompete problema.
Iha periodu suspensaun ne’e Governu liu hosi MJDAK hamutuk ho KRAM sei nafatin hakbesik ba organizasaun arte-marsiál idak-idak tanba iha planu ida katak tinan oin tenke iha ona kompetisaun atu oinsá mak halo prestasaun iha área desportu.
Jornalista Estajiáriu: Lazaro Pereira Quefi