Enkontru Ministeriál g7+ iha Díli, MNEK-TL Aprezenta Kompromisu Forma Futuru Di’ak Ba Povu

Hatutan.com, (11 Abríl 2025), Díli— Ministru Negosiu Estranjeiru no Komerisiu (MNEK), Bendito Freitas, aprezenta kompromisu iha ámbitu enkontru ministeriál membru sira g7+ kona-bá  forma future di’ak ba povu inklui promové prinsípiu demokrátiku sira no garante respeita valór umanu sira no ba estadu nia direitu.

Lee Mós: Xanana Introdús g7+ bá Estudante Sira iha Melbourne

Enkontru Ministeriál g7+ iha Díli, Sesta (11/04/2025). Foto/Repro.Espesiál

Iha diskursu  ba enkontru Ministeriál g7+ ba dala-VI no iha aniversáriu g7+ ba dala-XV ne’ebé hala’o iha Sentru Konvensaun Díli (CCD, sigla portugés), Sesta (11/04/2025), Ministru Bendito Freitas, hateten, enkontru ida ne’ebé signifikativu duni sai signifikativu liután tanba koinside ho aniversáriu ba dala-XV g7+ nian.

Iha tinan-15 ikus ne’e,  Ministru Bendito Freitas haktuir g7+ mosu hanesan lian ida ne’ebé maka’as ba estadu sira ne’ebé frajil no afetadu hosi konflitu ne’ebé defende solusaun sira ne’ebé lidera hosi nasaun, aprendizajen mútua, no solidariedade.

“Ita hatudu ona katak maské dezafiu barak ita-nia nasaun sira enfrenta, ita la define hosi frazilidade. Ami define hosi ami nia determinasaun, ami nia esperansa, no ami nia komprimisiu atu forma futuru ida ne’ebé di’ak liu ba ami nia povu,” Ministru Bendito Freitas hateten.

Enkontru ida-ne’e hanesan momentu ida reflesaun nian no mós xamada ida ba asaun. Enkuantu selebra marku sira ne’ebé membru g7+ atinji hamutuk, inklui mós tenke haree ba oin ba forma futuru dame no reziliénsia nian iha ita-nia rejiaun tomak no liután.

Knaar g7+ nian hetan rekoñesimentu internasionál tanba asegura interese no nesesidade espesífiku sira hosi nasaun sira ne’ebé frajil no menus dezenvolvidu ba asuntu sira kona-ba mudansa klimátika.

Estatutu observadór ne’ebé g7+ hetan iha Nasoins Unida mak testamentu ida ba nia influénsia ne’ebé buras no plataforma ida ne’ebé bele kontinua defende direitu no interese sira hosi estadu ida-ne’e hodi haburas liután.

Jornalista Estajiária: Zita Menezes