PNTL Identifika Sigarru Karton 420 Hosi Kambodia

Hatutan.com, (14 Abríl 2025), Díli – Polísia Nasionál Timor-Leste (PNTL) liu hosi Departamentu Investigasaun Kriminál (DIK) ho kontaktu  hosi Servisu Alfándega identifika sigarru kontentór ida ho karton 420 iha liña mean mai hosi Kambodia.

Lee Mós: Autoridade Timor-Leste Detein Sidadaun Estranjeira Ida ho Evidénsia Droga Kilograma 2,94

Iha loron 11 fulan-Abríl 2025, PNTL hetan kontaktu hosi parte Alfándega halo atuasaun ba kontentór noplutik tanba deskonfia sasán balu iha laran kontra bandu.

PNTL aprezenta prova sasán kontra bandu ka sigarru ne’ebé hatama hosi Kambodia. Foto/Lazaro Pereira Quefi

“Investigasaun Kriminál aprosima no identifika katak kontentór refere ho lisensa ba item ne’ebe mak nia atu hatama tisu maibé iha laran ho sigarru karton 420 mak ita deteta. Suspeitu ne’ebé mak ami identifika iha aktu krime ida ne’e ho inisiál MP no DCX mak hatama sigarru hamutuk karton 420 nune’e iha kada karton  iha slop 50” Diretór Diresaun Servisu Investigasaun Kriminál (DSIK) Superintendente Polísia João Belo, informa bá jornalista sira liuhosi konferénsia iha Kuartél Jerál PNTL, Segunda (14/04/2025)

PNTL hala’o kedas prosesu nune’e  prepara atu hato’o ba iha Ministériu Públiku tanba hamosu prejuizu makas ba Estadu kuaze $100,000. Nune’e, artigu ne’ebe mak aplika ba suspeitu mak artigu 267 kona-bá burla agrvadu no artigu 303 kona-bá falsifikasaun dokumentu no notasaun tékniku nian no artigu 314 fraude fiskál artigu 315 kona-bá bem merkadu no mós importasaun sira no artigu 317 kona-bá deskamina no artigu 316 kona-bá kontra bandu.

Sasán hirak ne’e mai ho kontentór mai hosi Kambodia tanba nia halo falsifikasaun la tuir dalan legal maibé tuir loloos so hetan lisensa mak bele tau informasaun sira ne’e depois mós tenke selu taxa tuir prosesu normal ne’ebe mak Alfándega aplika.

Tuir informasaun suspeitu ne’e hatama sasán hirak ne’e dala rua tuituir malu liu tiha ona maibé la identifika hetan nune’e agora hatama ba dala tolu nian mak foin deteta hetan.

Jornalista Estajiáriu : Lazaro Pereira Quefi