Hatutan.com, (04 Abríl 2025), Díli–  Autoridade Timor-Leste kompostu husi Servisu Alfándega ho Polisia Nasional Timor-Leste (PNTL) detein sidadaun estranjeira ida ho inisal HYM tanba deskofia lori kokaina  kilograma 2,94 mai Timor-Leste.

Lee Mós: Kazu Droga, PCIC Kaptura tán Suspeitu Ida iha Relasaun ho Sira Na’in-Sia

Autoridade Timor-Leste aprezenta ba públiku prova krime droga kilograma 2,94. Foto/Elio dos Santos da Costa

Komisariu Autoridade Aduaneiru Alfándega (AAA), Joanico Pinto, relata sira-nia parte identifika sidadaun estranjeira ho kokaina kilograma 2,94 ne’e husi rede Alfándega mundiál sira, katak objetu ne’e haruka hosi  Fransa ho nia final destinasaun mai  Timor-Leste.

“Ha’u labele públika ka divulga ami nia fontes informsaun ne’e mai husi ne’ebé, maibe ha’u hakarak hateten bá ita-boot sira, ita iha rede ida iha mundu tomak, sira alerta mai ami liu husi servisu ita bolu jestaun  risku, katak iha objetu ida deskonfia no suspira nia droga no nia final distinasaun mai Timor,” Joanico Pinto, informa bá Jornalista sira iha Kuartél Jerál  PNTL, Sesta (04/04/2025).

Bainhira Alfándega simu ida-ne’e halo apuramentu informasaun sira hotu no trata buat sira ne’e hotu ho konfidesialidade tanba atu ikus mai objetu ne’e bele dezvia.

“Ami komesa akompaiña tanba ami iha aerobil ne’ebé sira haruka akompaiña ninia rute ne’e, rute ne’e mak Fransa ba Singapura liu Bali no ikus liu mai Díli,” Joanico Pinto  hateten.

Bainhira sasan ne’e to’o, sasan ne’e haruka liu husi DHL, autoridade  halo kedas komunikasaun ho offisiál balun hosi DHL hodi asegura sasan labele fó bá nia nain no iha mós kordenasaun balun hamutuk ho Alfándega sira iha Bali  atu halo ezaminasaun ba objetu ida ne’e, maibe infelizmente objetu ne’e to’o iha Timor hetan korespondensia  ida mai hosi Bali, liu-liu Alfándega Indonézia nian iha Bali ne’e hateten katak hosi rejultadu sira nia teste ne’e uza mós K9. K9  ne’e ladetekta buat ruma iha ne’e, bainhira nune’e tanba iha informasaun iha ne’e  bolu dehan A1.

A1 ne’e dehan informasaun ne’e loos, entaun objetu ne’e to’o iha loron 28 fulan-Marsu, ekipa husik oituan tanba sira mós presiza atu hatene se mak nain,  buka atu  labele lakon buat sira ne’e, iha tempu ne’ebé hanesan sira nia offisiál balun halo kordensaun ho PNTL liu hosi departamentu investigasaun kriminal nasional  atu foti tester ne’e, hodi fasilita sira tes pre-eliminariu iha área juridiku alfandega nian iha Aero Portu Internasionál Prezidente Nicolau Lobato.

Prova krime droga kilograma 2,94. Foto/Elio dos Santos da Costa

“Bainhira haree modus operandu ida-ne’e modos ida foun sira tau sasan ne’e, dos ida falun objetu ne’e, sasan ne’e tau iha dos nia laran la’ós iha objetu prinsipál ne’e, entau kuandu ita chek objetu prinsipál ne’e buat ida laiha mas iha dos iha fali, entau bainhira ita-nia pesoál Alfándega sira foti uza makina Raiu-X ne’ebé mak iha ne’eba dala-hitu (7) mais iha objetu prinsipál ne’e laiha, mas detekta  fali iha  dos ne’e iha,” nia esplika.

Rezultadu teste ne’e mak Alfándega halo kedas komunikasaun ho DIKN-PNTL nian no imediatamente objetu sira ne’e entrega ba komandu PNTL para bele aprofunda liu tan ninia prosesu sira, inklui kaer suspeita ka ema sira ne’ebe na’in ba sasan ne’e.

Iha biban hanesan Superentidente Assistenti Polísia Xefi Interinu Diresaun Serbisu  Investigasaun Kriminal, Mouzinho Tavares Correia, hateten, iha loron  02 fulan-Abríl, PNTL ho Alfándega prende pakote ne’ebé parte Alfándega esplika ona.

“Iha loron 03 fulan-Abríl ne’e   komesa loke no bainhira ita loke ita hetan droga ne’ebé ho tipu kokaina ne’ebé mai hosi Fransa. Nia rute hahú husi Fransa mai Singapura mai Denpasar-Bali ikus mai Dili, entau sai husi Fransa iha loron 24 fulan-Marsu to’o iha Díli iha loron 28 fulan-Marsu tinan 2025 ho aviaun komersiál Citilink,” Superentidente Assistenti Polísia Mouzinho Tavares Correia hateten.

Relasiona ho evidensia ne’ebé mak  hetan no tenta hodi buka tuir se mak nain bá sasan ida ne’e, ne’ebé  identifika sidadaun ida iha Fransa nia mak manda sasan mai no to’o iha Timor mós identifika ona ema ne’ebé simu sasan ida ne’e.

Bazeia bá informsaun sira ne’ebé mak iha, Kinta (03/04/2025),  detein ona sidadaun estranjeira ida ho inisial HYM agora dudaun iha kontrolu autoridade nian.

Sasan sira ne’e naturalmente, kuandu droga ne’ebé ho tipu   kokaina ne’e ninia origen ne’e barak hosi Amerika Latina, Meksiko ho Kolumbia, maibe  seidauk hatene lolos ne’e hosi Kolumbia hosi Meksiko mais iha indikasaun katak iha involvimentu krime organizadu sira ne’ebe iha Meksiko.

Total husi evidensia ne’e hamutuk kilograma 2,94 no prosesu la’o hela, Sesta ne’e submete  ona kazu ne’e rezista ho Númeru Úniku Krime (NUK) 0090/2025 PNSIK.

Jornalista: Elio dos Santos da Costa