PNTL Sensibiliza Pás no Estabilidade Ba Estudante ISC

Hatutan.com, (23 Abríl 2025), Díli – Polísia Nasionál Timor-Leste (PNTL) liu hosi Diresaun Polisiamentu Komunitáriu, Kuarta (23/04/2025), hala’o Sensibilizasaun Planu Psychosocial ba dezenvolvimentu nasionál” iha Institutu Superior Cristal (ISC) atu estudante sira hametin unidade, kria pás no estabilidade iha eskola no mós iha sosiedade.

Estudante sira ISC pastisipa sensibiliza ba pás no estabilidade. Foto/Lazaro Pereira Quefi

Segundu Komandante Jerál  PNTL, Komisáriu Polísia Pedro Belo hateten sosializasaun ne’e importante tebes tanba iha relasaun ho problema lubuk ida ne’ebé mak sempre akontese iha komunidade nia leet no atu muda karater ema ida nian presiza iha formasaun, presiza iha sosializasaun no mós presiza iha diskusaun.

“Ita hotu hatene katak estatístika krime nian ne’ebe mak durante iha mak hanesan kazu ofensa integridade fíziku ne’ebe maka aas tebes iha territóriu Timor-Leste. Kazu ida-ne’e maioria foin-sa’e sira mak envolve no dalaruma mós akontese iha eskola entaun ita presiza tau atensaun ba ida ne’e,” Komisáriu Polísia Pedro Belo hateten.

Pedro Belo informa kazu violénsia doméstika mós sa’e maka’ás nune’e tanba saida mak feto no labarik sira sempre sai vítima tanba ne’e mak programa ida ne’e importante tebes atu bele hakbesik liu ba parte eskola sira, liuliu iha universidade sira atu halo sosializasaun.

Iha parte seluk mós akontese violasaun sinál tránzitu iha pontu estrada liuliu iha fatór umanu ne’e mak maka’ás tebes kada tinan sempre rejistu númeru ema mate ba asidente tráfegu ne’e barak entaun liu hosi sensibilizasaun sira hanesan ne’e mak atu haree fali tanba saida mak kazu sira akontese beibeik.

Iha fatin hanesan Reitór Institutu Superior Cristal Sebastião Pereira husu ba estudante sira hotu tenke servisu hamutuk ho komunidade sira atu kria dame, pás no estabilidade iha komunidade nia leet.

“Ha’u husu ba ha’u nia estudante sira ohin imi tuir ona sosializasaun ne’e ho komandante sira ne’ebe tenke fokus lalika tama sai tanba ida ne’e importante tebes duni atu oinsá mak  bele muda ita-nia karater atu kria pás iha komunidade no iha eskola” Reitór Institutu Superior Cristal Sebastião Pereira dehan.

Jornalista Estajiáriu: Lazaro Pereira Quefi