Ró Berlin Nakroma Hala’o Fali Operasaun Normál Díli-Ataúro

Hatutan.com, (14 Juñu 2025), Díli–Ró Berlin Nakroma  ne’ebé “avaria” tiha kuaze loron-tolu, Sesta (13/06/2025), hala’o hikas operasaun hodi atende konetividade marítima Díli-Ataúro bá-mai.

Lee Mós: Kuaze Fulan-Lima Halo Manutensaun ho Orsamentu US$786.000, Agora Berlin Nakroma “Avaria” Fali

Ró Belin Nakroma halo fali operasaun konetividade Díli-Atáuro, Sesta (13/06/2025). Foto/Aportil.I.P

Ró Belin Nakroma hahú “avaria” iha loron 10 fulan-Juñu ne’e, tanba falla uitoan ka xave aan tiha  iha  sistema Auxiliar Egine (AE) ida  parte karuk  nian.

“Konsellu Administrasaun APORTI,I.P foti desizaun katak 100% kondisaun  ró normal fali ona  no bele halo ona operasaun dezde Sesta ne’e ho konetividade maritima Díli-Atáuro bá-mai,”  Diretor Kapitazen Nasionál, Rolando Xavier informa ba Hatutan.com  iha edifisiu APORTIL,I.P.

Iha Sesta ne’e Berlin Nakroma hahú fali operasaun sai husi Portu Díli hale’u  tuku 12:00 meudia no to’o  iha Atáuro  tuku 15:00 Otl. Nune’e,  fila husi Ataúro to’o fali iha Portu Díli hale’u tuku 19:00 Otl.

Iha Sábadu ne’e, Ró Berlin Nakroma sai ona husi Portu Díli tuku 09:30 dadeer bá Ataúro no fila mai depois Domingu kontinua fali halo operasaun hosi Díli ba Atáuro.

Pasajeiru sira iha Ró Berlin Nakroma husi Díli ba Atáro, Sábadu (14/06/2025). Foto/Aprotil.I.P

“Ró ne’e nia problema la’ós iha  mákina, maibé iha  sistema DIPG, ne’e sistema foun ida ita instala foin dadauk ba doka  iha PT Dewa Ruci Agung-Surabaya ba ne’e mak iha Auxiliar Egine (AE) ne’e iha rua, ida parte loos ne’e diak parte karuk ne’e mak nia save an tiha entaun ita presiza tékniku  sira husi PT Dewa Ruci Agung  mai halo normalizasaun  fali,” Rolando Xavier hateten.

Ró Berlin Nakroma halo manutensaun iha PT Dewa Ruci Agung, Surabaya-Indonézia ho orsamentu US$786.000. Manutensaun ne’e han tempu kuaze fulan-lima liu, hahú husi fulan-Outubru 2025 no foin fila  mai Timor-Leste iha loron 11 fulan-Marsu 2025.

Jornalista: Juvinal Cabral dos Santos