Nasionál
Timor-Leste Halo Preparasaun Intensivu Adezaun Bá ASEAN
Hatutan.com (16 Juñu 2025), Díli— IX Governu konstitusionál ne’ebé lidera husi Primeiru-Ministru, Kay Rala Xanana Gusmão kontinua hametin reuniaun inter-ministeriál hodi halo preparasaun intensivu kona-bá Timor-Leste nia adezaun bá ASEAN iha fulan-Outubru, tinan ne’e.
Enkontru interministeriál hodi halo preparasaun intensivu kona-bá Timor-Leste nia adezaun bá ASEAN iha fulan-Outubru, tinan ne’e. Foto/Marcelino Tomae
Liuhusi reuniaun interministeriál ne’ebé hala’o iha salaun Ministériu Negósiu Estranjeiru no Kooperasaun, Segunda (16/06/2025), Primeiru-Ministru Kay Rala Xanana Gusmão, afirma adezaun Timor-Leste nian ba plenu ASEAN hanesan membru ba dala-11 hanesan momentu ida ne’ebé importante tebes iha estadu Timor-Leste nia istória.
“Ho laran haksolok boot mak ha’u hato’o ha’u-nia boas-vinda bá imi hotu iha sesaun importante ida-ne’e primeira reuniaun interministerial bá koordenasaun,” Primeiru-Ministru Kay Rala Xanana Gusmão hato’o iha nia diskursu.
Xefe Governu ne’e hateten, iha loron 26 fulan-Maiu liubá, iha simeira ASEAN nian iha Kuala Lumpur, Malázia deside tiha ona katak sei simu Timor-Leste hanesan membru Estadu ASEAN ba dala-11 iha simeira ASEAN ba dala-47 iha Malázia iha fulan-Outubru 2025.
Desizaun istórika ne’e, katak PM Xanana, hanesan rezultadu husi dedikasaun, kompromisu no traballu durante tinan barak. Hosi parte Governu, no instituisaun relevante sira, liu-liu hosi povu Timor-Leste no ne’e hanesan konkista boot ida bá Timor-Leste no bá ema hotu nia moris iha nasaun ida-ne’e.
“Reflete mós konfiansa ho apoiu hosi ita-nia viziñu sira hosi ASEAN ho sira-nia líderes. Ita iha razaun tomak atu selebra konkista ida-ne’e, maibé ita mós tenke rekoñese katak konkista ne’e marka inísiu hosi períodu ida ne’ebé ejizente liután,” Xanana hateten.
Husi agora to’o fulan-Outubru, katak PM Xanana, Timor-Leste tenke mantein foku koordenasaun hodi garante katak Timor-Oan hotu prontu ona atu sai º membru plenu ASEAN ba dala-11.
Iha 46.ª Simeira ASEAN, iha Kuala Lumpur, ezije bá Timor-Leste atu kumpre pasu prosesuál nesesáriu sira bá adezaun no atu aselera negosiasaun kona-bá akordu ekonómiku esensiál sira.
“Ne’e sei ezije esforsu sériu. Sei ezije uniaun, foku ho forte sentidu urjénsia. Ha’u apela ba imi hotu ministru sira, Vise-ministru sira, Sekretáriu Estadu sira no ekipa téknika sira atu hala’o misaun ne’e ho disiplina no determinasaun. Ita sei la tolera atrazu sira,” Xanana Gusmão alerta
Nia dehan, Governu Timor-Leste tenke garante katak grupu traballu interministeriál ASEAN nian ne’e ho rede pontu fokál sira iha kada ministériu hotu kapasitadu, iha meiu no bele servisu hamutuk.
Jornalista: Marcelino Tomae