HOAX! Aero Dili Soke iha Oé-Cusse

Hatutan.com, (20 Juñu 2025), Díli–Publikasaun iha media sosiál Facebook husi konta Facebook ho naran Media Timor ne’ebé kategoria ID Falsu haklaken informasaun falsa ka HOAX kona-bá aviaun Aero Dili soke iha Oé-Cusse.

Lee Mós: Inaugura Segundu Aviaun Aero Dili A319 ho Interese Loke Konektividade Timor-Leste ho Nasaun Sira Asia Hotu

Imajen HOAX ne’ebé partilla husi Konta Facebook Media Timor. Foto/Repro

Informasaun ne’ebé loloos mak imajen ne’ebé Media Timor utiliza ne’e la’ós aviaun Aero Dili, maibé aviaun aérea seluk nian.

Bele nota mós iha imajen ne’e katak Garbarate iha imajen ne’e la’ós iha Oé-Cusse tanba Aeroportu Rota de Sandalu  Oé-Cusse  seidauk  uza modelu Garbarate ne’e.

Liuhosi konta Facebook ofisiál Aero Dili nian ne’ebé Hatutan.com asesu, Sesta (20/06/2026), revela mós katak Aero Dili nia parte nota publikasaun falsa ka HOAX iha rede sosiál Facebook.

Bolu atensaun ba públiku sira hotu katak imajen ne’ebé   konta Facebook Media Timor publika ne’e la’ós aviaun Aero Dili maibé aviaun ne’e husi kompañia aéria seluk nian. Tanba ne’e, Aero Dili husu públiku lalika preokupa no kontinua matan-moris ba informasaun falsa ka HOAX sira ne’ebé espalla iha rede sosiál Facebook hosi Media Timor.

Aero Dili husu ba parte hotu atu utiliza rede sosiál Facebook ho responsabilidade no ho matenek atu lori informasaun ne’ebé fó benefísiu ba públiku no ba ita aan rasik hodi kontribui ba hakonu públiku nia informasaun ho loloos.

Jornalista: Zita Menezes