Projetu Demolisaun Bá Edifísiu Sentral RTTL,E.P ho Montante US$179,066.90 Hamosu Duvida

Hatutan.com, (24 Juñu 2025), Díli–Projetu demolisaun ba uma ka edifísiu Rádiu Televizaun Timor-Leste, Empreza Públika (RTTL,E.P) ho montante US$179,066.90 hamosu duvida.

Lee Mós: Projetu Konstrusaun Edifisiu Sentrál RTTL,E.P ho Kustu $3,760,405.00 Atraza

Dokumentu ne’ebé sitada item projetu demolisaun ho nia kustu US$179,066.90 husi UNDP nu’udár implementadór projetu konstrusaun edifisiu Sentral RTTL,E.P. Foto/Repro

Konstrusaun ba edifísiu sentrál RTTL,E.P ne’e previstu investimentu ida  ho montante US$5,970659,11  atu remata ka termina  iha fulan-Marsu 2026 ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés).

Aleinde konstrusaun, projetu ne’e inklui formasaun téknika ba jornalista sira no profisionál RTTL sira seluk ho objetivu atu hametin abilidade ekipa nian enfrenta  ezijénsia komunikasaun modernu no efetivu.

Projetu konstrusaun  edifisiu sentrál RTTL,E.P ne’ebé ezekuta husi kompañia kontraktor PT Aulia Multi Sarana husi Indonézia ho kustu total US$3,760,405.00. Maibé, parte sira, UNDP nu’udár implementadór projetu hatama mós  iha proposta item projetu demolisaun ho kustu US$179,066.90.

Informasaun ne’ebé Hatutan.com asesu husi fontes sira iha RTTL,E.P hateten katak orsamentu ne’ebé kontein ba item demolisaun ho montante US$179,066.90 ne’e atu utiliza halo demolisaun ba uma ida ne’ebé tanba uma anteriór ne’e sobu tetuk tiha ona, no agora iha terrenu projetu nian iha de’it uma andár  foun ida ho kondisaun di’ak loos no sofistikadu hodi sai edifísiu provizóriu ba ekipa servisu RTTL,E.P.

Uma ka edifísiu foun ne’e mak   naran Edifísiu David Alex “Daitula” ho nia medida uma andár-tolu, utiliza ba servisu redasaun, produsaun no administrasaun RTTL,E.P nian ne’ebé konstrui iha tempu prezidente Konsellu Administrasaun José António Belo “Taraleu” nian.

Dezeñu edifisiu foun RTTL,E.P. Foto/Espesiál

Fontes husi tékniku balun iha RTTL,E.P ne’ebé husu atu la bele publika nia identidade haktuir sé osan ho montante US$179,066.90 ne’e UNDP hanesna implmentadór projetu aloka kustu ba  demolisaun ne’e atu sobu uma antigu Rádiu Repúblika Indonézia (RRI) nian ne’ebé tempu UNTAET nian utiliza ba Rádiu no Televizaun UNTET no mai tempu ukun aan nian utiliza hanesan edifísiu sentrál RTTL,E.P, ne’e la iha lójika tanba edifísiu antigu RRI nian ne’e RTTL,E.P rasik mak sobu ka harahun uma ne’e ho nia moru sira hotu ho apoiu husi Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P).

Iha Tersa dadeer (24/06/2025), Hatutan.com halo esforsu atu hasoru  parte kompetente sira iha UNDP atu konfirma kestaun progresu projetu konstrusaun edifísiu foun RTTL,E.P ne’ebé la’o atraza, inklui konfirma dotasaun orsamentu US$179,066.90 ne’ebé UNDP koloka ba projetu demolisaun ne’e, maibé la konsege.

Hatutan.com mós tenta halo konfirmasaun ba númeru kontaktu parte kompetente UNDP nian ne’ebé kontempladu iha akordu kontratu UNDP ho empreza internasionál PT Aulia Multi Sarana ba projetu konstrusaun edifísiu foun RTTL,E.P nian ne’e, maibé pesoál UNDP ne’ebé simu kontaktu ne’e seidauk bele fó informasaun ka komentáriu tanba sira iha nia prosedimentu rasik (própriu) atu la bele pronunsia ka fó kualkér informasaun bainhira la iha autorizasaun husi sira-nia seniór management.

Hatutan.com mós halo esforsu ona dezde Segunda to’o Tersa (23-24/06/2025), atu hasoru prezidente Konsellu Administrasaun RTTL,E.P, Elizeu Isaac Fernandes, hodi halo konfirmasaun,  maibé okupadu hela no tuir informasaun ne’ebé simu husi pesoál sira iha Gabinete Prezidente RTTL,E.P nian katak prezidente okupadu hela ho servisu, no Tersa-ne’e hala’o viajen ba Munisípiu Ermera no loron tuir mai Kuarta (25/06/2025), kontínua hikas viajen ba Munisípiu Ainaro.   

Jornalista: Marcelino Tomae