MPRM Aprezenta Potensialidade no Obras Estratéjiku iha Covalima Bá Inspetór ho Auditór Sira

Hatutan.com, (28 Juñu 2025), Díli— Ministru Petróleu no Rekursu Minerál, Francisco da Costa Monteiro, aprezenta ba auditór no inspetór sira hosi administrasaun Estadu kona-ba potensialidade mina-rai no obras estratéjiku sira ne’ebé sai hanesan komponente importante hosi projetu Suai Supply Base.

Lee Mós: Produsaun Mina no Gas iha Bayu-Undan Hapara Ona

Ministru Francisco da Costa Monteiro, aprezenta ba auditór no inspetór sira hosi administrasaun Estadu kona-ba potensialidade mina-rai no obras estratéjiku sira ne’ebé sai hanesan komponente importante hosi projetu Suai Supply Base. Foto/Média MPRM

Lokál ba vizita  dahuluk mak mina-matan Suai Loro,  Ministru Monteiro aprezenta auditór no inspetór sira ne’ebé inklui hosi Tribunál ba Konta, Komissaun Funsaun Públika (CFP – sigla Portugés), Ajénsia Dezenvolvimentu Nasionál (ADN),no  Komisaun Nasionál Aprovizionamentu (CNA) kona-ba potensialidade rekursu petrolíferu hosi prespetiva téknika no jeolójika.

“Durante prosesu konstrusaun aeroportu Internasionál Komandante Ein-Xefe FALINTIL, Kay Rala Xanana Gusmão iha Covalima, sidadaun balun afetadu hosi projetu ne’ e no governu hari’i mós zona rezidénsia ba sidadaun sira,  ho utilizasaun materiál lokál no komunidade kontente tebes ho projetu Kosta Súl ne’ebé iha efeitu multiplikadora ba sidadaun.” Hatutan.com sita  komunikadu imprensa ne’ebé asesu, Sábadu (28/06/2025)

Vizita sira-ne’e taka ho observasaun bá Aeroportu Covalima ne’ebé iha tempu besik sei sai hanesan baze operasaun ba kompaña Weststar Gap Aviation (Konsórsiu entre TIMOR GAP, E.P.no Weststar Aviation hosi Malazia) ho kompaña Santos ba servisu dezmantelamentu hosi Kampu Bayu Undan no mós servisu nesesáriu balun.

Inspetór no auditór sira hetan informasaun sufisiente kona-bá futuru setór petróleu no minerál, infraestrutura iha Kosta Súl ho nia efeitu sira, no esforsu atu dezenvolve gazodutu mai Timor-Leste, liu-hosi akumulasaun hosi Kampu Bayu Undan ne’ebé sei iha rezerva, Chudich, inklui hosi Greater Sunrise no rekursu petrolíferu hosi rai-maran.

Jornalista: Marcelino Tomae