Kumpre Rekizitu FIFA, FFTL Lansa Planu Estratéjiku Futebol Feminina 2025-2028

Hatutan.com, (12 Jullu 2025), Díli–Federasaun Futeból Internasionál (FIFA) hatuur rekizitu 11 ba Federasaun Futeból Timor-Leste  (FFTL) inklui federasaun futeból hotu iha mundu atu kumpre. Ho nune’e, FFTL halo hela ezersísiu boot kumpre rekizitu sira-ne’e, inklui rekizitu ida tenke iha planu estratéjiku futeból feminina.

Lee Mós: Governu Aprova Proposta FFTL Reabilita no Halo Konstrusaun Estádiu Foun ho Kampu Futsal Indoor

FFTL lansa planu estratéjiku futeból feminina iha Ótel Timor, Sábadu (12/07/2025). Foto/Marcelino Tomae

Iha Sábadu  (12/07/2025), iha otél Timor, FFTL lansa ona planu estratéjiku ida ba futeból feminina nian  periodu 2025-2028 hodi sai matadalan ba dezenvolvimentu futeból feminina iha Timor-Leste.

“Planu estratéjiku ne’e atu prepara ita nia aan  no mós atu kumpre rekezitu sira ne’ebé maka  mai husi FIFA ne’ebé federasaun futeból hotu iha mundu adopta,” reprezentante prezidente FFTL, Domingos Luís Cairo informa  bá Jornalista sira hafoin ansamentu  planu estratéjiku futeból feminina.

Rekizitu 11 husi FIFA bá FFTL tenke kumpre no halo tuir  mak hanesan ;

1. Autonomia Institusionál, katak FFTL tenke iha autonomia kompletu husi interferénsia governamental ka polítiku iha nia estrutura no dezenvolvimentu.
2. Estatutu no Regulamentu Harmonizadu, katak estatutu FFTL tenke harmonia ho Estatutu Padrão husi FIFA no AFC (Asian Football Confederation).
3. Sistema Eleitoral Transparente, katak eleisaun ba lideransa FFTL tenke hala’o ho sistema livre, justu no transparente.
4. Igualdade no Inkluzaun, katak FFTL tenke promove igualidade entre sexo, idade, no grupa sosiál sira, inklui feto iha dezenvolvimentu futeból.
5. Desenvolvimentu Juvenil no Grassroots, katak tenke iha programa no planu ba futeból juvenil no grassroots (nivel base), tuir diretiva FIFA.
6. Infraestrutura Futeból katak FFTL presiza uza no garante instalasaun desente ba treinu, jogo no administrasaun.
7. Sistema Kontrola Finanseiru, katak iha obriga-saun transparénsia no prestasaun konta, tuir padraun auditoria husi FIFA.
8. Programa Treinamentu Kontínua, katak promove formasaun tekniku ba treinadór, árbitru no ofisiál futeból sira, bazeia ba metodologia FIFA.
9. Organiza Kompetisaun Nasionál, katak FFTL tenke organiza kompetisaun regulares ba klube sira, inklui ligas sénior, juventude, no feto.
10. Promove Anti-Korrupsaun no Étika, katak FFTL tenke iha komisaun etik no mekanismu ba prevene korrupsaun, ho kopera ho FIFA Ethics Committee.
11. Relatoriu no Komunikasaun Regulares ho FIFA

Tuir loloos prezidente FFTL Nilton Telmo Gusmão dos Santos mak halo lansamentu  bá planu estratéjiku ne’e, maibé tanba nia hetan hela komvite husi prezidente FIFA  atu partisipa  iha jogu finál  entre klubu nasaun nian iha Estadu Unidus Amérika, entaun delega hela ba vise-prezidente Domingos Luís Cairo hodi halo lansamentu.

Domingos Luís Cairo  preokupa, lansamentu  planu estratéjiku ne’e  tuir  loloos  Governu nia reprezentante partisipa maibé okupadu no tuir loloos bele delega hela diretor jerál   marka prezensa  hodi  ajusta planu estratéjiku ida-ne’e tau iha planu orsamentu Governu nian  atu eleva partisipasaun feto sira iha mundu futeból.

Kona-bá FFTL  atu  priense kriteriu 11, tuir nia katak, ho lideransa Nilton Gusmão,  hanesan Prezidente FFTL,  hahú ona kumpri daudaun ona kondisaun haat husi rekizitu  FIFA nian no aumenta tan lansamentu planu estratéjiku futeból feminina ne’e kumpre ona rekizitu lima husi 11.

Nia esplika rekizitu ida maka  loloos tenke iha liga futeból  mane ho feto,  ho oras minutu 90,  maibé  iha tinan ne’e liga futeból Timor-Leste la konsege  realiza jogu ne’ebé barak to’o de’it jogu hamutuk 40, entaun  husi  parte futsal  iha ona planu atu loke liga iha tempu badak ho planu kalendariu ne’e sei iha jogu 90

“Sé futsal halo tan, ita  aumenta tan rekizitu ida  iha esperansa boot FFTL  sei iha esforsu tomak antes termina nia mandatu iha estrutura ida-ne’e sei kumpri hotu rekizitu 11 husi FIFA ne’e tuir kondisaun FFTL nian rasik,” Domingos Cairo hateten.

Nia  afirma, rekizitu 11 ne’e bele aumenta ona orsamentu  hodi finanseia  bá  liga tantu feto no mane, kapasitasaun no formasaun, treinador ho arbitrajen sira, boa Governasaun bá iha  ferderasaun ne’e rasik.

Iha fatin  hanesan ofisiál futeból feminina, Lizia Magno, haktuir planu estratéjiku ida-ne’e hala’o ho nia objetivu   atu hasae partisipasaun feto  iha futeból, liuliu bá jogadór sira, treinador, arbitrajen, no mós bá administradora feto sira ne’ebé hola parte iha lideransa  futeból nian.

Nia dehan, planu estratéjiku ne’e rasik halo  iha tinan kotuk no finaliza  iha tinan ida-ne’e, nia esperansa  maka bainhira implementa planu estratéjiku ida-ne’e bele hasae partisipasaun feto sira iha futebol no bele atende  no atinji meta sira ne’ebé maka  refeleta ona iha planu ne’e rasik.

Nia esplika, implementasaun bá planu estratéjiku ida-ne’e, bele segura FIFA for word programe, ne’ebé foka liu iha atu atividade feto sira, ne’ebé  espesifiku bá dezenvolvimentu liga feto  no dezenvolvimentu kapasidade feto sira tantu jogador halo mós kampaña  ka promosaun futeból feto iha Timor-Leste.

Jornalista: Marcelino Tomae