Membru PN Apoiu Ekipa Taskforce Oho Asu Sira Ne’ebé La’o Livre

Hatutan.com, (19 Agostu 2025), Díli– Membru Parlamentu Nasionál apoiu desizaun Governu ne’ebé orienta ekipa konjunta Ministériu Saúde (MS) ho Ministériu Agrikultura, Pekuária, Peska no Floresta (MAPPF) hodi  oho  asu, busa ho lekirauk  sira ne’ebé la’o livre iha espasu públiku hodi prevene moras raiva ka rabies.

Lee Mós: Oho Asu sira iha Zumalai La’ós Maneira Efetivu Prevensaun Virus Raiva

Membru PN, David Dias “Mandati”. Foto/Dok

Membru PN husi Bankada FRETILIN David Dias Ximenes “Mandati” hateten iha área sira ne’ebé risku virus raiva ka rabies hanesan iha munisipiu sira fronteira terrestre ho Indonézia, mak la halo karantina ka kesi sira-nia asu hodi  husik la’o livre iha espasu públiku ne’e konsidera na’in laiha.

“Sé husik la’o tuun la’o sa’e, Governu iha razaun tomak para depois halo atuasaun ruma, kuandu nia la’o tuun la’o sa’e iha estrada la’ós iha uma signifika asu ne’e na’in laiha, depois animal  asu ne’e maka sai hun bá  raiva,  tenke iha duni solusaun bá ida-ne’e,” Deputadu David Mandati hateten bá jornalista sira iha PN, Tersa (19/08/2025)

Membru Bankada FRETILIN ne’e hateten, ema balu maka sai ona  vítima bá moras raiva, entaun saida maka Governu halo  tenke halo nune’e, kuandu  lakohi kumpre kualkér orden, kualkér norma, sempre iha protesaun kurativa katak lei ne’e iha karakter obriga, kuandu  lakohi halo tuir tenke obriga, ne’e maka  desizaun  Governu agora hala’o hela.

“Kuandu sala ita kritika, kuandu la sala ita mós tenke brani dehan sira nian mós loos. Ha’u apoiu, asu ida la’o tuun la’o sa’e de’it nia na’in sira lakohi kesi metin, laiha dalan seluk,” Deputadu Mandati hateten.

Nia hatutan loos katak públiku sira kestiona dehan asaun ekipa konjunta  oho asu ne’e hamosu violénsia kruél bá animal. Mais agora asu ne’e  iha na’in ka lae,  kondena asu mais asu tata ema mate ne’e iha violénsia ruma ka lae.

Antes ne’e iha Plenária Parlamentu Nasionál liuhosi Prezidente Komisaun F ne’ebé trata asuntu Saúde, Igualdade no Seguransa Sosiál Deputada Maria Gorumali Bareto husu Governu atu hasai desizaun rigorozu hodi oho tiha animál asu sira ne’ebé la’o livre hela iha estrada ninin ka espasu públiku.

Vise-Ministru Asuntu Parlamentár Adérito Hugo da Costa hateten Ministériu Saúde preparadu ho sira nian ekipa vijilánsia ne’ebé prepara antes tiha ona, tama ona iha efetividade kontrolu animal sira iha sidade Díli.

Nune’e husu ona populasaun sira ne’ebé maka ho animal asu atu bá halo vasina no tau prioridade bá Munisipiu sira ne’ebé maka besik fronteira sira, agora Ministériu Saúde iha hela faze halo intervensaun iha terrenu bá kazu sira ne’ebé maka akontese ona.

Jornalista : Zita Menezes