Kazu Buska iha Otél Oe-Upu, Tribunál Seidauk Hatun Desizaun no Defeza Mantein Nia Kliente Sira Inosente

Hatutan.com, (28 Agostu 2025), Oé-Cusse-Audénsia interrogatóriu dahuluk bá suspeitu na’in-neen iha kazu deskonfia envolve iha jogu online iha Otél Oe-Upu, Oé-Cusse, Kinta (28/08/2025),  seidauk iha desizaun finál husi Tribunál Judisiáriu Primeira Instansia Oé-Cusse (TJPIO).

Lee Mós: Deskonfia Loke Jogu Online, PCIC ho SNI Halo Buska iha Otél Oe-Upu no Detein Sidadaun Estránjeiru Liu Na’in-10

PCIC ho MP aprezenta arguido sira ba kazu jogu online iha Otél Oe-Upu ba TJPIO, Kinta (28/08/2025). Foto/Juvinal Cabral dos Santos

“La autoriza atu ha’u divulga rezultadu interogatóriu dahuluk ne’e. Ami  iha obrigasaun tenke asegura segredu justisa, portantu ida-ne’e seidauk hateten katak arguido sira ne’ebé mak aprezenta mai iha Tribunál sai hanesan maksalak, maibé atu hateten de’it katak iha indisiu  nia iha direitu hanesan inosente ne’ebé mak lei asegura,”  advogadu Octaviano Cardoso ne’ebé fó asisténsia  justisa bá suspeitu sira hateten ba jornalista iha resintu TJPIO.

Octaviano Cardoso afirma relasiona arguidu nain-neen nu’udár sira-nia kliente ne’ebé aprezenta husi Polísia Sientifika Investigasuan Kriminál (PCIC) ho Ministériu Públiku (MP)   iha TJPIO ne’e seidauk iha rezultadu ba medida koasaun. Nune’e, Sesta (29/08/2025), TJPIO foin hatun despaxu medida koasaun Tribunál nian.

“Normalmente iha lapsu barak katak arguido sira  ne’e  asegura de’it iha sira-nia rezidénsia labele hetan liberdade sai husi ne’ebá to’o lori de’it mai iha prosesu interogatóriu dahuluk. PCIC la lori arguidu sir aba detensaun no ida-ne’e mekanizmu laloos,”  advogadu Octaviano Cardoso hateten

Nia fó razaun katak ohin haree rasik arguidu sira ne’e ba iha sela detensaun, mais kalan ida de’it tuir loloos ne’e  tenke oras 72 nia laran iha tiha ona sela detensaun molok aprezenta iha Tribunál.

Iha Segunda kalan to’o Tersa  (25-26/08/2025), autoridade sira husi PCIC ho SNI halo buska no apreensaun, inklui halo idenitifkasaun ba sidadaun estranjeiru na’in-10 ho nasionalidade Indonézia, Singapura no Malázia ne’ebé deskonfia pratika jogu online ilisítiu iha  Otél Oe-Upu Rejiaun Administrativu Espesial Oé-Cusse Ambeno (RAEOA).

Durante  julgamentu bá  interogatóriu dahuluk ne’e, Ministériu Públiku    solisita   bá tribunál hodi  aplika  prizaun preventiva bá arguidu na’in-neen  tanba deskofima komete krime ilisítiu (jogu online) no krime burla informátika.

Parte defeza rasik  husu  Tribunál atu aplika medida koasaun termu indentidade  rezidénsia (TIR) ho razaun arguidu na’in-neen  la komtete krime,  katak jogu online Scam call center ne’ebé loke iha  Rejiaun Administratvia Oé-Cusse Ambeno (RAEOA)  no lokaliza iha Otél Oé-Upu ne’e  legál.

Eustáquio Guterres , nuu’dár mós defeza ba arguido sira liuhosi  telefonéka  ba Hatutan.com katak,  razaun parte defeza husu tribunál atu aplika TIR tanba  ekipa defeza konsidera arguidu  na’in-neen  ne’ebé  loke jogu online scam call center  tuir prosesu legál.

“Ami nia razaun bá ami  nia kliente, loos duni katak, sira la komete krime,  halo nusá maka tenke bá prizaun  preventive fali, jogu ne’e legál hela,”  Eustáquio Guterres hateten.

Husi sorin seluk Hatutan.com konfirma ho investigadór PCIC, Dedi Álvario da Silva hateten,  PCIC halo nia análize intelejénsia  trata ema ho dingu,  tanba ne’e PCIC ho SNI lakohi  tau arguidu bá sela.

“Tanba sira mai husi estranjeiru  mai iha Oé-Cusse, sira atu halai bá ne’ebé,  tanba ami bele kontrola   hela sira,  entaun ohin advogadu dehan ami trata ema la dingu, entaun dingnu bá iha sela,  loos ne’e tau iha sela, maibé sira telefoni ami dehan eipah nusá maka tau iha sela, depois ko’alia bá jornalista buat ida, imi husu pedidu bá ami ko’alia buat ida,”  Dedi Álvario da Silva haktuir.

Kona-bá argudu sira ne’e,  tuir nia katak loloos ne’e na’in-10, maibé na’in-haat halai  tiha molok  PCIC ho SNI tama primeiru halo identifikasaun  iha Otél-Upu

Julgamentu  interogatóriu dahuluk iha TJPIO ne’e prezide husi  juiz Evangelino Belo, Ministériu Públiku reprezenta husi Prokuradór José Belo  no Mateus Nesi,  arguidu na’in-neen hetan asiténsia legál husi Defensór Públiku Eustáquio Guterres no Advogadu Privadu Octavio Cardoso.

Lee Mós: Atuasaun PCIC ho SNI iha Otél Oe-Upu Hamosu Dúvida no Dezentendimentu

 Jornalista: Juvinal Cabral dos Santos/Marcelino Tomae