Hatutan.com, (26 Agostu 2025) Oé-Cusse—Ekipa konjunta husi Polísia Siéntifika Investigasaun Kriminál (PCIC) ho Serbisu Nasionál Intelejénsia (SNI), Segunda (25/08/2025),  tuku 21:00 kalan,  halo vizita surpreza iha Otél Oe-Upu  hodi halo buska no apreensaun ba fatin sira ne’ebé deskonfia hala’o atividade jogu online.

PCIC halo identifikasaun ba sidadaun estranjeiru sira ne’ebé deskonfia servisu ba jogu online iha Otél Oe-Upu, Oé-Cusse. Foto/Hatutan.com

Husi Segunda to’o Tersa kalan ne’e (25-26/08/2025), autprodade sira husi PCIC ho SNI halo idenitifkasaun ba Oé-Cusse oan balu, ho mós sidadaun estranjeiru liu ema na’in-10 ho nasionalidade Indonézia, Singapura no Malázia ne’ebé empreza jogu online rekruta hala’o servisu ba atividade jogu online iha  Otél Oe-Upu , Rejiaun Administrativu Oé-Cusse Ambeno (RAEOA).

Iha buska no apreensaun ne’e, PCIC ho SNI rekolla prova ka evidénsia balun, hanesan telefone  sira  ho mós  sistema aplikativu jogu online  nian. Ekipa PCIC ho SNI kontínua identifika bá pesoál ka traballadór sira, tantu Timoroan  no estranjeiru  sira, ne’ebé deskonfia hola parte iha jogu online ne’e.

Informasaun ne’ebé  Hatutan.com  asesu husi fontes sira iha Otél Oe-Upu katak prezensa ekipa konjunta SNI ho PCIC laiha koñesimentu bá Prezidente Autoridade Rejiaun Administrativu Oé-Cusse Ambeno (RAEOA) no halo buska iha tempu kalan no la aprezenta mandadu ruma husi Tribunál. Maske nune’e, tuir informasuan katak Kuarta (27/08/2025), autpridade PCIC ho SNI sei aprezenta prova no suspeitu sira ne’ebé hetan detensaun ba Ministériu Públiku (MP).

Iha fulan-Jullu 2025, empreza Internasionál Seagull Resort husi Malázia, arrenda Otél Oé-Upu ba tinan-50 ho kustu arrenda nian millaun $9 atu loke jogu online iha Oé-Cusse.

Prezidente Autoridade RAEOA, Rogério Tiago Fátima Lobato tempu ne’ebá deklara katak jogu online ne’e Governu Sentrál mak sei hasia lisensa tanba ne’e parte RAEOA halo koordenasaun hos Vise Primeiru-Ministériu bá Asuntu Ekonómia, Ministru Turizmu no Ambiente atu bele fó lisensa hanesan baze legal ba atividade jogu online ne’e.

To’o notísia ne’e públika seidauk hetan konfirmasaun husi parte PCIC, SNI ho parte empreza Seagull Resort, inklui Prezidente Autoridade Rejiaun Administrativu Oé-Cusse Ambeno, Rogério   Tiago de Fátima Lobato.

Jornalista: Marcelino Tomae