02 Janeiru 2026, Reforma Obrigatóriu Funsionáriu Públiku 2000-resin

Hatutan.com, (08 Setembru 2025), Díli- Prezidente Komisaun Funsaun Públika (KFP) Agostinho Letêncio de Deus hateten, Komisaun Funsaun Públika identifiká ona funsionáriu públiku ne’ebé ho idade 65 hamutuk 2000-resin maka sei tama reforma obrigatóriu iha loron 02 fulan-Janeiru 2026.

Lee Mós: Governu ho CFP Avalia Prioridade ba Tinan 2025 iha Reforma Administrasaun Públika

Prezidente KFP, Agostinho Letêncio de Deus. Foto/Dok

“Lei define ona, katak iha reforma obrigatóriu bá funsionariu públiku idade 65 bá leten, no  iha loron 02 fulan-Janeiru 2026 tama ona bá reforma obrigatóriu, iha 2000-resin, entre ne’e Minsitériu Edukasaun maka númeru reformadu boot liu,”  Prezidente KFP Agostinho Letêncio de Deus bá jornalista sira iha Palásiu Governu hafoin partisipa reuniaun Konsellu Ministru, Segunda (08/09/2025).

Prezidente KFP hateten,  iha tinan 2026  hahú tama ona bá reforma obrigatóriu, no iha tinan ida-ne’e  KFP la’o hela servisu hamutuk ho Ministériu Edukasaun (ME) idetifiká funsionáriu sira ne’ebé maka atu tama bá reforma obrigátoriu.

KFP ho ME   identifiká mós funsionáriu profesór sira ne’ebé agora daudaun bolu moras prolongada, entaun identifiká 300 sira hanesan ne’e. Ministru sira ho funsaun públika bá halo ona vizita iha munisipíu sira sei kontinua nafatin to’o  tinan 2026.

“Ita iha 300 resin ita halo bá rua, ida ita halo identikasaun pur númeru, ida fali ita halo vizita husi númeru ne’ebé ita deteta agora daudaun ekipa ne’ebé lideradu husi Ministra Edukasaun no ekipa husi Komisaun Asuntu Reforma Obrigatóriu bá vizita ida-idak hodi haree sira nian kondisaun no rona opiniaun sira no esplika bá sira oinsá maka atu hetan reforma obrigatóriu,” Prezidente KFP ne’e hateten.

Nia hatutan tán katak reforma obrigatóriu la signifiká hamenus, iha tinan kotuk Ministériu Edukasaun halo reajustamentu boot ida  no tinan ida-ne’e bá oin sei halo reajustamentu no define tamañu forsa traballu inklui profesór sira.

Jornalista: Zita Menezes