Timor-Leste Iha Potensiál Beleza Patrimóniu Kultural Bele Sai Destinu Turizmu Sustentavél Kompetitivu

Hatutan.com, (26 Setembru 2025), Díli– Rezultadu  diskusaun loron daruak bá Fórum Investimentu Turizmu Timor-Leste 2025 ne’ebé realiza iha  loron 26 Setebru iha Sentru Konvensoen Díli (CCD) reafirma Timor-Leste nia beleza no patrimóniu kulturál ne’ebé riku, no lokalizasaun estratéjiku oferese potensiál signifikativu hodi sai destinu turizmu ne’ebé sustentável no kompetitivu iha rejiaun ida-ne’e.

Lee Mós: Tempu Ona Dezenvolve Setór Turizmu iha Timor-Leste

Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente Francisco Kalbuadi Lay halo intervensuan iha Forum Turizmu 2025. Foto/Espesiál

Nune’e proveita poténsia ne’e, Governu Timor-Leste, liuhosi Ministériu Turizmu no Ambiente, iha kolaborasaun ho Ministru Koordenadór Asuntu Ekonómiku (MCAE) no Korporasaun Finansas Internasionál (IFC), konvoka Fórum Investimentu Turizmu Timor-Leste 2025 iha okaziaun Loron Mundiál Turizmu nian ne’ebé termina iha loron ohin, 26 Setembru 2025.

Komunikadu Imprensa ne’ebé Hatutuan.com asesu relata katak fórum ida-ne’e halibur líder governu sira, reprezentante setór privadu, parseiru dezenvolvimentu, no parte interesada komunitária sira nee hodi diskute kona-ba oportunidade investimentu no estratéjia sira hodi aselera kreximentu setór turizmu Timor-Leste nian.

Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente Fransisco Kalbuadi Lay reafirma kompromisu hodi servisu besik liu ho Komisaun Interministerial no parte interesada sira hodi asegura monitorizasaun no progresu kontínuasaun bá aspetu  dezenvolvimentu turizmu nian.

Governu kompromete hodi hadi’a instalasaun báziku no seguransa, hodi garante ambiente ida ne’ebé seguru no akollidu bá  vizitante sira. Hodi enfaze bá mantein Timor-Leste nia identidade kulturál. Katak, dezenvolvimentu settór turizmu tenke reflete valór no tradisaun lokál sira, la’ós replika de’it modelu sira hosi nasaun seluk.

Forum ne’e mós konklui espansaun bá formasaun rekursu umanu hodi harii abilidade iha servisu ospitalidade no turizmu nian, enkuantu promove ai-han no produtu lokál sira nu’udár parte husi esperiénsia turizmu úniku Timor-Leste nian.

Nune’e liuhosi biban ne’e, alerta mós unidade bá asaun Timor-Leste tenke kaer momentum sira ne’e hodi haburas parseria ne’ebé forte, no implementa prioridade hirak ne’e hodi koloka nasaun nu’udár destinu ne’ebé sustentável no atrativu bá vizintante no investidór internasionál sira hotu.

Forum Investimentu Turizmu  Timor-Leste 2025, organiza husi Ministru Turizmu Ambiénte, no  kolabora ho Banku Mundiál,  ajénsia korporasaun Finansa Internasionál  (IFC),  Kámara Komersiu Industria Timor-Leste (CCI-TL siglá Portugés), no apoiu moralmente husi Banku Sentral Timor-Leste nomós membru Governu lubuk ida, forum ne’e halo durante loron 25-27 Setembru 2025, nomós atu selebra loron turizmu mundiál nian.

Jornalista : Zita Menezes