PA RAEOA Régio Salu Suspende Investimentu Ne’ebé Oé-Cusse Simu Ona Kontratu Arrendamentu Millaun $4

Hatutan.com, (16 Outubru 2025), Díli– Prezidente Autoridade Rejiaun Administrativu Espesiál Oé-Cusse Ambeno (RAEOA), Régio da Cruz Salu,  liuhosi  nia karta haruka ba investór Mr. Ken Lim, Nú. Reference: 201 RAEOA-TL/X/2025 ba empreza Core Management  Corporation Unipessoal, Lda hodi suspende atividade investimentu iha Otél Oé-Upu sei lori risku boot bainhira impreza Core Management loke prosesu iha Tribunál.

PA RAEOA, Régio da Cruz Salu

Informasaun ne’ebé Hatutan.com asesu hosi fonte prinsipál sira iha RAEOA haktuir empreza internasionál  Core Management  Corporation Unipessoal, Lda estabelese kontratu konsesaun ho Autoridade RAEOA ba investimentu Otél Oe-Upu ba tinan-30 ho total arrendamentu  millaun $9. Nune’e, iha tinan primeiru Autoridade RAEOA simu tiha ona millaun $4 no ba tinan segundu mós simu ona millaun $2.5 no tuir loloos ba tinan terseiru nian atu simu tan millaun $2.5.

Tuir fontes ne’e katak daudaun ne’e iha Otél Oe-Upu ne’e, empreza Core Management  Corporation Unipessoal, Lda investe ona totál orsamentu millaun $5. Maibé, derrepente de’it, PA RAEOA  Régio da Cruz Salu haruka karta suspensaun hodi suspende atividade investimentu internasionál sira ne’e ho razaun atu halo fali revizaun ba atividade investimentu.

Empreza intevestimentu sira ne’ebé tenke kumpre karta despaxu PA RAEOA,   Régio da Cruz Salu hodi suspende obrigatóriu sira-nia atividade investimentu, kompostu husi Core Management  Corporation Unipessoal, Loteria Enclave Internacional Lda, Dream World Lda, European Credit Investment Bank Ltd.

“Kestaun suspende ka taka jogu online ka scam center ne’,  buat ketak ida, tanba ema hirak suspeita ba atividade ne’e nia prosesu iha ona Tribunál. Agora, empreza investimentu sira hanesan Core Management  Corporation Unipessoal, Lda husi Malázia ne’ebé estabelese kontratu konsesaun ho Governu ho montante millaun $9 no ita simu ona millaun $4 primeiru, segundu ita simu tan ona mós millaun $2.5 ne’e, oinsá atu ita devolve no karik nia lori ba Tribunál ne’e oinsa. Investór sira la fiar kedas ita,” fontes ne’e fo hanoin.

Karta suspensaun husi PA RAEOA, Régio da Cruz Salu. Foto/Repro

Ba preokupasaun ne’e, jornalista sira halo kofirmasaun ho PA RAEOA, Régio da Cruz Salu, Kinta (16/10/2025) iha Ministériu Finasas, Dili, klarifika katak  suspende hanesan prosesu ida atu haree fila-fali karater ho natureza kontratu ne’e, tanba autoridade RAEOA halo desizaun arrenda nia patrimóniu ba parte interesadu parseiru estratéjiku investór Internasional.

“Ha’u PA RAEOA obedese ba saida mak rezolusaun foin dadauk ne’e, no informa atu ita haree fila fali la’ós dehan katak atu duni sai ema (investor) ne’e lae, atu informa katak  ita sei halo revizaun,” Prezidente Autoridade Pa RAEOA, Régio da Cruz Salu  esplika.

Nia reiteira katak suspende atividade investimentu sira-ne’e atu haree fila-fali natureza interese RAEOA nian, la’ós osan mais kona-bá natureza karater servisu hamutuk nian, promove RAEOA, promove kooperasaun ida ne’ebé di’ak ba Timor-Leste no pavu hotu.

“Hanesan ha’u dehan ema hotu-hotu ne’ebé investe iha Oé-Cusse ne’e parseiru estratéjiku, uza ita nia rekursu hanesan ita-boot  nia uma, ita-boot aluga ba ema, ita-boot iha regra ka lae, ita-boot iha interese ka lae. Ha’u hanoin ita-boot nia interese la’ós ba osan ne’e de’it. Interese ba buat barak interese estratéjiku, mais ha’u lako’alia kona-bá foin dadauk krime organizadu ne’e tanba ne’e kesataun seluk, no ha’u ezekuta de’it ha’u nia obrigasaun,” nia tenik tan.

Nia argumenta tan, hasai karta ne’e signifika tuur hamutuk atu haree ba oin no  risku ruma karik hotu-hotu hatene no responsavel hanesan.

“Ha’u nu’udar prezidente autoridade ha’u Oe-Cusse oan, ha’u tenke hateten ba ha’u nia parseiru sira ha’u tenke haree fila-fali karater arrendamentu ne’e tanba leí fó dalan, leí RAEOA no kona-bá investimentu nasional mos hateten hanesan ne’e”.

Prezidente Autoridade afirma, hanesan prosedimentu ida hodi lao tuir, maibé parseiru nafatin parseiru estratéjiku iha RAEOA, se mak mai hamutuk ho Oé-Cusse hetan oportunidade di’ak hamutuk maibé prezerva karaker povu Oé-Cusse ninian.

Nia rekoñese katak nia parte la iha intensaun katak karta suspende atividade investimentu hirak ne’e mak  sai autor ba jogu online iha Oé-Cusse ne’e  lae no ida-ne’e ne’e parte seguransa nian.

“Ha’u la dehan ida ne’e, tanba ne’e Nasional mak dehan Organiza Kordenasaun apresaun ba saida mak nasional deteta no hatene, kona-ba RAEOA foin dadauk ne’e kestaun defeza no seguransa ke tuir Leí numeru 3° Governu la atribui kompetensia ne’e ba RAEOA. Entaun ami obedese de’it ne’e mak ami halo konferensia imprensa foin dadauk iha dia 13 ne’e, ami tenke obedese tanba rezolusaun numeru 54/2025, loron 02 fulan Outubru tinan 2025 ne’e emidiatamente efetivu.”

Prezidente Autoridade RAEOA  ne’e karifika mós katak kona-bá investór nia osan arrendamentu millaun $9 iha investimentu Otél Oe-Upu ne’e buat ketak id, tanba tuir nia karta ne’e atu PA RAEOA bele kruza no tau nia definisaun.

“Ha’u nia preukupasaun no ha’u nia interese mak atu haree parseiru estratéjiku sira ne’e ita hotu-hotu bele asegura interese hamutuk ba Oé-Cusse, tanba Oé-Cusse iha papel estadu nian tomak iha ne’ebá, nune’e liu husi revizaun atu haree fali buat sira liu kotuk, oinsa ita sente ba oin ne’e di’ak liu,” Rógeio da Cruz Salu hateten.

Autoridade ne’e dehan,  ida ne’e la iha problema tanba iha dalan klaran ne’e avaliasaun tenke iha determina ka deteta buat ruma ne’ebé presiza, buat ida dinámiku ne’e sempre akontese tenke re-ajusta.

Jornalista: Juvinal Cabral dos Santos