Adrovaldo Nahak Submete Keixa Ba MP ho Komandu PNTL Kontra Membru PNTL Nain-Lima Baku Nia iha Palásiu Governu Oin

Hatutan.com, (20 Outubru 2025), Díli-Vítima Adrovaldo Nahak ho nia alin Santiago Fernandes, akompaña husi portavós EUTL (Estudante Universitáriu Timor-Leste) Segunda (20/10/2025),  submete keixa ba órgaun kompetente sira hodi kontra membru   na’in-lima ne’ebé baku lesuk nia  iha Palásiu  Governu oin, foin lalais ne’e.

Lee Mós: PNTL Na’in-lima Baku-Lesuk Adrovaldo

Vítima Adrovaldo Nahak ho nia alin Santiago Fernandes, akompaña husi portavós EUTL  submete keixa ba órgaun kompetente sira hodi kontra membru na’in-lima ne’ebé baku lesuk nia iha Palásiu Governu oin, foin lalais ne’e. Foto/Juvinal Cabral dos Santos

Adrovaldo Nahak hanesan estudante finalista Universidade Nasional Timor Lorosa’e (UNTL) Fakuldade Siénsia Sosiál (FCS) Departamentu Siénsia Polítika (CP) kanek iha hasan ho nia alin   Santiago Fernandes kanek iha kotuk tanba hetan baku k  husi membru PNTL nain-lima.

“Ha’u ho portavós EUTL, inklui alin Santiago Fernandes, ami halo karta ida hato’o ona ba iha Komandu Jerál PNTL, Provedoria Direitus Humanu no Justisa (PDHJ), Ministériu Públiku (MP), Ministériu Interiór (MI), inklui mós Parlamentu Nasional (PN),” Adrovaldo Nahak hateten.

Tuir planu, Adrovaldo Nahak h onia alin hatama mós karta ba iha Organizasaun Naun Govermental (ONG) sira, hanesan Asia Justice  And Rights (AJAR), Forum ONG Timor-Leste (FONGTIL), inklui mós Polísia Sientifika Investigasaun Kriminál (PCIC) hodi kontesta asaun brutalizmu ne’ebé membru PNTL na’in-lima halo hasoru sira.

“Ha’u ema sente la sala, ha’u ko’alia ha’u nia fuan sente triste ha’u ko’alia de’it maun sira, ida ne’e mak  ha’u nia sala ne’e ha’u la simu. Ne’ebé ha’u sei prosesa tuir baze legál ne’ebé mak iha, ha’u la iha odiu ruma no vigansa ruma ho PNTL na’in-lima, maibé baku ha’u ita sei hasoru malu iha dalan  legal,” nia hateten.

Iha fatin hanesan portavós EUTL, Natalizio Nunes esplika, ligadu kazu agresaun fiziku ne’ebé membru PNTL na’in-lima baku lesuk Adrovaldo Nahak prosesu hahú la’o.

“Ita hatene katak PNTL ne’e seguransa interna ne’ebé atu asegura sidadaun iha ita-nia rai ne’e, ho sira nia moto katak ‘Proteje no Serví’. Agora ita atu proteje sidadaun, fila ita halo fali agresaun fiziku hasoru sidadaun, entaun ida-ne’e mak ami la konkorda no depois iha momentu ne’ebá temi tan katak kolega ne’e demonstrante EUTL nian, kazu demostrasaun ne’e la iha relasaun saida mak kolega ne’e halo, maibé sira atua la tuir regra,” Natalizio Nunes hateten.

Estudante ne’e husu, PNTL presiza iha kapasidade liu-liu iha atuasaun ne’e, para atua kazu ruma tenke tuir regra, tanba tuir lei uzu  ho forsa nian ne’e la permiti Polísia halo agresaun fiziku hasoru sidadaun bainhira la iha asaun ruma husi ema ne’e rasik.

Iha sorin seluk, Provedoria Direitos Humanos no Justisa (PDHJ)  Virgílio da Silva Guterres “Lamukan” ba Hatutan.com iha nia knar fatin, Caicoli, Sesta (17/10/2025), deklara sira-nia parte kondena maka’as aktu membru Polísia na’in-lima baku lesuk sidadaun maun-alin na’in-rua ne’ebé hatudu deit membru PNTL sira-nia karater arrogansia. Nune’e, husu Komandu Jerál PNTL  atu halo asaun disiplinar hasoru membru na’in-lima ne’e.

“Ha’u pesoalmente haree informasaun ne’e iha média, iha Balibo kedas ha’u haree, ha’u partilla kedas liuhosi WhatsApp ho Komisariu Jerál PNTL, Henrique da Costa, komunikasaun liuhusi WhatsApp ne’e, Komisariu Jerál PNTL hateten katak ita tenke enkoraza vitima atu hato’o keixa ba Ministériu Públiku (MP) no mós ba Komandu jerál PNTL,” Virgílio da Silva Guterres “Lamukan” haktuir.

PDHJ kondena hahalok bandalismu ne’ebé hala’o husi  membru Polísia sira. Primeiru ema na’in-lima atu baku sidadaun ida ho razaun ida ne’ebé la klaru no la’ós ema baibain, Polísia mós la’ós sira ida ne’ebé  servisu iha diresaun tranzitu, sira Task-forsa, entaun atu halo auto stop ne’e deit la loos.

PNTL ne’e Instituisaun estadu ninian, estadu harii atu serví nasaun no proteje sidadaun sira la’ós sai fali ameasa ba sidadaun sira.

“Husi parte PDHJ ninian ha’u seidauk fó orientasaun klaru, mesmu ha’u partilla ona informasaun ne’e ba iha grupu no orsida sei fó orientasaun klaru ba parte diresaun fiskalizasaun no monitorizasaun atu halo monitorizasaun, ami mós enkoraja vitima bele hatama keixa ba iha PDHJ, maibé di’ak liu keixa ba iha Ministériu Públiku (MP)  ho keixa ba Komandu PNTL atu ita haree,” Provedor Virgílio “Lamukan” informa.

Nia esplika, manifestasaun universitariu sira nian ne’e direitu konstitusional ne’ebé konstituisaun garante. Entaun polísia labele uza fali ida ne’e atu halo vigansa ba joven sira, halo vigansa ba estudante sira ida ne’e sai baze ba provedor ninian pozizaun.

Jornalista: Juvinal Cabral dos Santos