Hatutan.com, (16 Outubru 2025), Díli– Adrovaldo Nahak hanesan estudante finalista Universidade Nasionál Timor Lorosa’e (UNTL) Fakuldade Siensia Sosiál (FCS) Departamentu Siensia Polítika (CP) kanek iha hasan ho nia alin   Santiago Fernando  kanek iha kotuk tanba hetan baku husi membru Polísia Nasional Timor-Leste (PNTL) na’in-lima  (5) iha Palásiu Governu nia oin.
Lee Mós: PDHJ Kontra Tribunál Aplika Medida Koasaun AP Bá Membru Polísia Tiru Nia Kaben

Vítima nia oin kanek hafoin baku husi membru PNTL nian-lima iha Pálasiu Governu nia oin, Kinta-kalan (15/10/2025). Imajen/Juvinal dos Santos

Adrovaldo Nahak iha nia rezidensia iha Matadoru,  Dili, Kinta (16/10/2025) haktuir ba Hatutan.com, katak nia tuir nia-alin sira ba  tuur hela iha Palásiu Governu nian oin,  nune’e mós  Polísia husi Eskuadra Vera Kruz nian hala’o patrolla iha área ne’ebá no  lakleur  nian alin dehan ba nia katak motór para hela maibé polísia derrepenti mai atu prende lori ba Vera Kruz.

“Ha’u husu ba membru Polísia,   ita boot sira nia papel hanesan saida? Sira dehan, ami halo hela patrolla, entaun ha’u dehan se ita-boot sira halo hela patrolla labele foti motór, úniku atu  prende motór ne’e  Polísia Tránzitu nia servisu de’it. Ho emosaun Polísia hatan ami hatene situasaun rai-laran, ita-boot lahatene buat ida, ha’u hatan, lae ha’u hanesan sidadaun ha’u mai iha fatin públiku ne’ebé mak asesu livre ha’u mai ne’e ami ho alin sira ko’alia halimar fila ona”.

Motór sira ne’ebé autoridade seguransa foti atu sae ba de’it, maibé la taka kapasete   ho nune’e nia hasee katak, maun sira tilang tiha depois lori ba Eskuadra Vera Krus mak la uja kapasete ne’e oinsa? ho emosaun membru PNTL na’in-lima tuun dala ida mai baku lesuk no dehan ba nia, ba Eskuadra mak rezolve maibé nia rasik la sala buat ida.

“Ha’u nia kotuk laran ne’e sira tebe-tuku, ha’u nia hirus matan parte karuk ne’e sira tebe to’o agora sei moras, hotu ha’u nia alin hamrik mai husu tanba saida mak baku ha’u nia maun la sala ida, entaun sira simu tan alin, lees tiha alin nia jaket la hatene sira tuku ka tebe oinsa alin nia kotuk laran ne’e mós mosu riska mean boot ida”.

Adrovaldo hateten, ohin Kinta 16 fulan Outubru tinan 2025 dadeer hala’u tuku 09:00 Otl ba halo tratamentu iha klinika Bairo-Pité hasai raiu-x maibé ruin di’ak hela, maibé parte hasan mak kanek no aban nia sei kontinua ba visum ho USG hodi hatene kondisaun tanba agresaun ba nia ne’ebé makas tebes, inklui lori mos nia alin ba halo tratamentu.

Vitima kondena aktu, membru Polísia nia atuasaun, nia hatene  ne’e Polísia nia servisu maibe membru polísia nain-lima nia prosesu ho kapasidade atendimentu ba ema sira hakarak tur ka “healing” iha fatin publiku mak nune’e, bainhira lakon diskusaun ho ema ikus uza emosaun ho razaun atu asegura situasaun rai laran ne’e ladi’ak.

“Dala ida-tan hau hateten ba imi, ha’u la’ós mafiozu/kriminzu. Imi baku lisuk ida sala laek, hodi ko’alia hasoru imi ho motiu saida mak imi atu foti de’it ha’u nia motór sem check-point”, imi halo patrulla de’it, la’ós tranzitu hodi check-point ba ema nia motór sira para iha tasi ibun, imi hanesan taks force  nia servisu mak atende krimi sira la’ós ba hada’u hotu fali papel tranzitu sira nian.
Adrovaldo haktuir, depois ba to’o iha Postu Vera-Kruz haruka Scot-jump/la’o uza kelen, membru Polísia ida la’o mai ko’alia kedas, “ohhh, O duni o mak biasa hakilar dehan  Polísia SMA beik-ten ne’e ka.”

“Ha’u sei hateten tan “ha’u nia família lubuk ida mak iha instituisaun PNTL laran ami mós kontribui, ha’u seidauk ko’alia no trata PNTL sem faktu tanba ha’u nia família mos Polísia. O eskola iha ne’ebé, imi mak biasa halo demo ne’e ka, ha’u hatan eskola iha Universidade Nasional Timor Lorosa’e (UNTL) finalista, belun polísia ida nia hanesan kondutor, halai tebe ha’u nia hirus matan ho tempu ne’ebé hanesan ida husik kotuk fai/bomba tama tan ha’u nia ruin/kotuk laran, hodi dehan imi sira dehan ami polisia SMA beik-ten ne’e  imi Universidade beik-ten mak ne’e ga”, adrovaldo afirma.

Polísia ida mós dehan, ohh nia ne’e Estudante Universitariu Timor-Leste (UNTL) nia ema sira, lori nia ba sela Caicoli agora, ne’e mak nain-5 baku lisuk nia depois alin hamrik mai husu nusa mak baku fali nia maun la sala ne’e, sira simu tan alin “repete”.

Vitima ne’e konsiente ona katak autoridade seguransa odiu nanis ona, tanba nia hahú iha 2017 sa’e mai ne’e inklina ona iha demostrasaun ho nune’e nia konsidera Polísia odiu nanis to’o orseik loron Kuarta 15 fulan Outubru tinan 2025, mak kaer hanesan momentu oportunidade di’ak ida ba sira hodi baku.

“Sira lori to’o ha’u mai tiha sela Kaikoli halo tiha investigasaun, tau iha razaun ne’ebá hateten katak ha’u la halo kooperasaun ho sira ne’e mak  detein ha’u atu hatama ba sela, maibé ho komunikasaun ne’ebé ami halao ikus mai sira husik fali ami nain rua iha kantor Polísia Kaikoli oin, ami nain rua alin la’o ain fila fali ba iha Palacio Governu hodi foti fali motor”.

Adrovaldo esplika, motor ne’ebé Polísia atu foti ne’e alin ida ne’ebé sira la’o hamutuk ninian, Polísia atu tilang mak alin ne’e halai tiha, maibé sira la’ós duni motor ne’e.

“Polísia sira fila baku fali ha’u ida hamriik hela ne’e, ha’u sente eipah ha’u la sala buat ida koalia buat los hela tanba saida baku fali ha’u”.

Nia apelu ba Públiku, nune’e ba oin favor ida imi sira transporte privadu iha halo movimentu publiku karik, karta kondusaun, asesoris transporte privadu no karta/surat-surat motor kareta iha karik lori hela ba, atensaun hela ho kazu ne’ebe mak hanesan, sira bele atua imi ho baku/tebe ho razaun la ha koperasaun ho sira tenkiser ba halo investigasaun, afinal sira baku/tebe ita dolar didiak ikus, husik fali ita husi postu de’it.

“Hau hatene, dalaruma nune’e imi kala odiú hau naruk/kleur soke aproveita tempu, hodi baku ha’u gratis, maibe di’ak hela ha’u nafatin dehan ne’e mak imi nia servisu duni, ha’u husu deskulpa ba imi tanba la kopera ho imi la’ós tranzitu hodi hadah de’it ema nia transporte privadu hodi lori ba Kaikoli, liafuan ida ne’e mak, ha’u sala tiha deit, tan de’it husu razaun no la fo savi motor nian ba imi mak ha’u nia pekadu duni. Ha’u la fo savi motor ida espelu/asesoris la iha ne’e ba imi tanba, motor ne’e para antes ami to’o antes ona, no imi task-force la’ós tranzitu”.

Vitima ne’e husu karik iha lei, esplika tok mai dekretu lei ou regulamentu PNTL ida ne’ebé mak hateten katak: Wainhira ema nia transporte para iha fatin hela, hanesan task force  lao’s tranzitu bele ba lori ema nia transporte ba postu Polísia.

Relasiona kazu membru Polísia nain 5 ataka joven iha Palacio Governu oin ne’ebé Vitima fó sai iha media sosial,  jornalista sira komfirma ba  Porta-vos interiñu Polísia Nasional Timor-Leste (PNTL), Superintendente Asistente Polísia Mozinho Correia, iha konferensia imprensa Ministériu Interior (MI), Kinta (16/10/ 2025), ne’ebé relata hela  servisu parte seguransa nian iha teritoriu Timor-Leste, maibé parte Portavós PNTL seidauk iha informasaun sei ba halo komfirnasaun semana oin bele fó sai.

Jornalista: Juvinal Cabral dos Santos