Governu Simu Dokumentu Falsu Barak Liga ho Dívida Husi Ospitál Estranjeiru

Hatutan.com, (06 Novembru 2025), Dili– Primeiru-Ministru Kay Rala Xanana Gusmão, informa IX Governu simu dokumentu falsu barak relasiona ho dívida husi ospitál estranjeiru ne’ebé mai iha Governu anteriór.

Lee Mós: Komisaun F Konfirma Governu Sei Halo Pagamentu Millaun $8.9 Bá Dívida iha Ospitál Estranjeiru Sira

PM Kay Rala Xanana Gusmão. Foto/Zita Menezes

Primeiru-Ministru Kay Rala Xanana Gusmão hateten  dívida bá ospitál iha rai-li’ur dehan seidauk selu hotu loos, dívida ne’e IX Governu  tama iha fulan-Jullu tinan 2023, millaun $32 mai husi Governu anterior.

“Dívida  bá Ospitál iha rai-li’ur kada dokumentasaun ami bele aprezenta hotu, dívida bá ospitál iha rai-li’ur millaun $32   mai husi VIII Governu, komú millaun $32 ita bele hasai hotu kedan iha tinan ida, ko’alia ho ospitál sira konkorda malu di’ak selu uituan-uituan, aat liu tán mak simu dokumentu falsu barak, ami haruka fila-fali bá sira rekoñese, ne’e sala duni, ne’e maka selu nei-neik mais tinan ida-ne’e atu selu ultimu nian ne’e millaun $10,”  Primeiru-Ministru Kay Rala Xanana Gusmão informa iha sala plenária PN iha debate OJE 2026 faze jeneralidade, Kinta (06/11/2025).

PM Xanana Gusmão hateten, IX Governu  la selu de’it ospitál  iha rai-li’ur  haruka resibu mai haruka dokumentu mai Governu liuhosi Ministériu Saúde  haree kurizi uituan-uituan ne’ebé sei iha duni millaun $10, mais atu dehan katak  la’ós IX Governu nian dívida.

Iha fatin Ministra Saúde, Élia A.A. dos Reis Amaral hateten kuandu iha inisíu IX Governu iha dívida ne’ebé husik hela husi Governu anteriór sira, nune’e IX Governu selu  nei-neik dívida ne’e tanba tenke ho kuidadu.

Ministra Saúde (MS), Élia A.A. dos Reis Amaral. Foyo/Juvinal Cabral dos Santos

“Ami deteta katák iha ema balu, ha’u labele mensiona iha ospitál ne’ebé, ami deteta iha klazula balu hateten katak 5% juru ita la hatene sé maka simu no osan ne’e bá ne’ebé ita la hatene, nune’e maka ho resibu pasiénte sira ne’e mai ami haree ho kuidadu ami analiza depois ami  halo pagamentu iha totál mismenus to’o millaun $38 ne’e osan boot tebes entaun ne’e ami sei selu ho fazeadamente,” Ministra Saúde Élia  Amaral haktuir iha plenária.

Iha debate Orsamentu Jerál Estadu (OJE) 2026, Deputadu Bankada PLP Helder Freitas hato’o bankada PLP nian  lamentasaun kona-bá dívida sira husi Ospitál rai-liur ne’ebé to’o agora IX Governu seidauk resolve.

 “Ami tenke hateten duni katak IX Governu konstituisionál la kumpre nian politiká atu hadi’a povu nian moris no falla fó solusaun bá problema sira hotu-hotu iha setór saúde liuliu fornese ai-moruk la sufisiente bá ospitál sira no la rezolve dívida ospitál iha rai li’ur,” nia tenik.

Jornalista: Zita Menezes