Timor-Leste iha Difikuldade Kompete Kuantidade Produtu iha Merkadu ASEAN

Hatutan.com, (06 Novembru 2025),Díli— Vise-Ministra bá Asuntu ASEAN, Milena Rangel rekoñese  Timor-Leste  iha difikuldade kona-bá kuantidade produtu lokal atu kompete iha merkadu nasaun sira Estadu membru ASEAN.

Lee Mós: Sai Ona Membru ASEAN, PM Xanana Husu Joven Timoroan Prepara Aan Lidera RDTL

Produtu lokal sei menus tebes atu bele kompete iha merkadu estadu membru ASEAN sira. Foto/Dok

Vise-Ministra bá Asuntus ASEAN, Milena Rangel, haktuir maske iha difikuldade atu lori  Timor-Leste kompete bá merkadu ho kuantidade, maibé Timor-Leste garantia sei kompete  ho kualidade.

“Ita atu kompete  merkadu ho kuatidade  ita sei araska, maibé ita kompete iha kualidade,”  Vise-Ministra bá Asuntus ASEAN, Milena Rangel hatete bá jornalista bainhira partisipa iha iha debáte OJE 2026 bá jereralidade bá loron dauruak nian iha Parlamentu Nasionál,  Kinta (06/11/2025).

Vise-Ministra Milena hatutan, Timor-Leste tama ASEAN la’ós  ko’alia de’it kona-bá produtu  bele mós bá servisu no oportunidade bá  investimentu hosi investór internasionál sira.

Milena Rangel hatutan  Timor-Leste ténke foka liubá kualidade produtu lokál ne’ebé bele sai orgullu hanesan kafé, kakau no kaizu, atu bele hola parte iha merkadu internasionál.

“Ita la’ós tenke bá ho kuantidade, maibé ho kualidade. Se produtu ita-nia kualidade di’ak, hanesan produtu órganiku, entaun ita bele konkore iha merkadu internasionál, maske produtu la bárak. Iha rejiaun, ita bele liután, se ita fó prioridade bá kualidade,” nia hateten.

Nia esplika tan katak iha rejiaun Ázia, nasaun barak iha produtu hanesan, maibé ezemplu di’ak mak Singapura. “Maski Singapura paíz ki’ik-oan no laiha rai barak atu kuda sasán, maibé sira konsege sai susesu iha área ‘trading’ no ‘services’.

Kona-bá saída maka Nasaun membru ASEAN atu  aprende hosi Timor, tuir  Ministra Milena katak, Nasaun membru sira ténke kontribui bá  pás, establidade no prosesu rekonsiliasaun.

“Ita hakarak kontribui pás no establidade,  no mós  ita nia prosesu rekonsiliasaun,” nia afirma.

Jornalista: Marcelino Tomae