Orsamentu Prezidente Repúblika US$12.175.212 Aprova iha Espesialidade

Hatutan.com, (13  Novembru  2025), Díli- Parlamentu Nasionál aprová ona Orsamentu Jeral Estadu (OJE) 2026 ne’ebé aloká bá  Prezidente Repúblika ho montante US$12.175.212 iha faze  espesialidade ho votasaun a-favór 44 , abstensaun 20  no kontra zero.

PN aprova orsamentu ne’ebé aloka ba Prezidente Repúblika iha proposta OJE 2026 iha faze espesialidade, Kinta (13/11/2025). Foto/Média G-PM

“Rezultadu votasaun bá orsamentu Prezidente Repúblika  passa,” Prezidente Parlamentu Nasionál Maria Fernanda Lay deklara iha Plenária hafoin hala’o diskusaun no votasaun iha espesialidade, Kinta (13/11/2025).

Membru PN husi Bankada FRETILIN  Antoninho Bianco hateten, programa Repúblika Prezidente  nian iha tinan 2026 ne’e repete fali de’it programa tinan kotuk nian,  hanesan dapur bá povu, maratona, halo uma dignu no PR kuazé halo hotu servisu orgaun ezekutivu nian.

“Hakarak hateten katak estadu ne’e orgaun soberanu ida xefe estadu ne’e labele akumula servisu ezekutivu sira nian, ezekutivu ne’e sé mak lidera mak Primeiru-Ministru ne’e konstituisaun prevé,” Deputadu Antoninho Binaco subliña.

Deputadu ne’e afirma  no fó hanoin katak buat ne’ebé la’ós Prezidente Repúblika nia papél, hirak ne’e hotu mak reprezentante povu preokupa no konsidera hodi  fó hanoin no  apoiu bá Governu no papél bá fali ezekutivu ne’e labele, selae uma dignu mós Prezidente Repúblika halo no  Governu mós halo,  ida-ida halo ninian entaun kualkér asuntu Governante sira nian servisu sira tau hotu kedan.

Xefe Bankada CNRT Deputadu Patrocino Fernandes hateten, Prezidente Repúblika ne’ebé ho inisiativa politiká para dudu dezemvolvimentu tán ida-ne’e mak orsamentu tau iha ne’ebá ne’e.

“Prezidente Repúblika ida agora hakarak servisu bá ninian povu servisu bá nian rai, ne’ebé estadu iha devér para atu tau osan para ajuda ninian atividade ne’ebé mak nia hakarak atu servisu ne’e,” Deputadu Patrocino Fernandes tenik.

Hatán bá preokupasaun proposta husi pronente sira ne’e Vise Primeiru-Ministru no Ministru Koordenadór Asuntu  Sosiál no Ministru Dezenvolvimentu Rurál no Abitasaun Komúnitaria, Mariano Assanami Sabino hateten, katák orsamentu  ne’ebé koloká bá Prezidente Repúblika ne’e liu tiha ona husi diskuzaun ida ne’ebé detallu ta’is ona iha komisaun revizaun orsamentu  (KRO) no aprová ona iha konsellu-ministru, nune’e orsamentu ne’e iha fatin para bele fó apoiu bá iha Prezidente Repúblika.

“Ha’u hanoin katak laiha problema ho orsamentu ne’ebé mak koloká iha Prezidente Repúblika, laiha problema ho semi prezidensialista tanba ita hanoin katak Prezidente Repúblika iha elentu direita tanba ne’e mak nia iha responsabilidade atu promové paz sensibilazaun bá populasaun para depois transforma bá sibilizasaun di’ak liu tanba ne’e kompeténsia PR nian,”tenik VPM Mariano Assanami Sabino iha PN.

Vise Primeiru-Ministru Assanami Sabino husu Deputadu proponente sira bá proposta hirak ne’e  bele dada tiha fali proposta sira ne’ebé mak hato’o para atu ko’a prezidente Repúblika nian orsamentu tanba laiha fatin.

Iha diskuzaun bá orsamentu Prezidente Repúblika, iha  proposta hamutuk 10 proposta numeru 67, 88 retira no proposta numeru 48, 49, 50, 51, 52, 53, 76, 85   sira ne’e la passa hotu ho rezultadu  votasaun  a-favór 23 abstensaun 4 kontra 37 nune’e proposta hirak ne’e la passa.

Orsamentu Jeral Estadu (OJE) 2026 ne’ebé Governu aloká bá Prezidente Repúblika hamutuk US$12.175.212, saláriu vensimentu US$5.053.746, bens no servisu US$5.746. 366 , tranferénsia públika US$1,005,100, kapital menór US$320.000 no kapitál dezenvolvimentu zero.

Aprová Mós Orsamentu PN US$19.073.404

Hafoin remata votasaun bá orsamentu Prezidente Repúblika, Prezidente Parlamentu Nasionál (PP, N) Maria Fernanda Lay afirma tanba laiha proposta bá orsamentu Parlamentu Nasionál tanba antes ne’e halo diskusaun nune’e direita bá vota bá orsamentu Parlamentu Nasionál iha faze espesialidade.

“Rezultadu votasaun bá orsamentu Parlamentu Nasionál a-favór 41 Abstensaun 23 kontra zero hodi nune’e orsamentu Parlamentu Nasionál  nia passa ”Dehan Prezidente Parlamentu Nasionál Maria Fernanda Lay iha Plenária.

Orsamentu husi Parlamentu Nasional hamutuk US$19.073.404 ne’e aloka bá  saláriiu vensimentu US$11.217.005, bens no servisu US$6.242.298, transferénsias públika  US$955.180, kapital menor US$ 658.921 no kapital dezenvolvimentu zero.

Jornalista : Zta Menezes