Deskonfia Falsifika Dokumentu Veteranu, HABADA Husu Komandu Jerál PNTL ho Ministru Interiór Fó Sansaun Todan Ba Superintendente Asistente Polísia AQ

Hatutan.com, (17 Novembru 2025), Díli– Diretór Ezekutivu Asosiasaun Hali Ba Dame (HABADA), Abel Amaral husu Komandu Jerál Polísia Nasional Timor-Leste (PNTL) ho Ministru Interiór (MI), Francisco da Costa Guterres, tenke halo investigasaun no fó sansaun todan ba Superintendente Asistente  Polísia  AQ  ne’ebé deskonfia falsifika dokumentu veteran hodi hetan grau 8 a 14.

Lee Mós: Membru PNTL Ida Suspeita Falsifika Dokumentu Veteranu

Diretór Ezekutivu Asosiasaun Hali bá Dame (HABADA), Abel Amaral

“Ita triste tebes no lamentavel ho atitude  Superintendente Asistente  Polísia  AQ  ne’ebé deskonfia  komete fasifika dokumentu veteran nian,” Diretór Ezekutivu HABADA, Abel Amaral  hateten iha  Konferesia Imprensa iha nia knar fatin, Comoro,  Segunda (17/11/2025).

HABADA husu Diresaun Servisu Investigasaun Kriminál (DSIK) husi PNTL atu bele koopera ho komisaun verifikasaun dadus veteranu Munisipiu Lautem atu bele verifika loos duni ka lae kona-ba informasaun falsifika dokumentu veteranu ne’e.

“Presiza mós enkamiña ba iha Ministériu Publiku (MP) para bele prosesu tuir Leí Kriminál nian, tanba flasifikasaun dokumentu ne’e krimi ida. Ita husu ba Komandu PNTL no mós ba Ministru Interiór (MI) se kuandu prova duni tenke fó sansaun ida ne’ebé mak todan tanba ida ne’e hatudu ezemplu la di’ak,”  Abel Amaral afirma.

Jornalista: Juvinal Cabral dos Santos