Justisa & Krime
MP Tenke Verifika Prova ho Sériu Bá Kazu Fornesimentu Kombustivél no Manutensaun Karreta iha RTTL.E.P
Hatutan.com, (25 Novembru 2025),Díli— Ministériu Públiku (MP) tenke verifika prova sira ho sériu bá kazu projetu fornesimentu kombustivél no manutensaun karreta iha Rádiu Televizaun Timor-Leste, Empreza Púnliku (RTTL.E.P).
Dokumentu komprovadu sira relasiona ho konkursu publiku servisu fornesimentu kombustivel no servisu fornesimentu manutensuan karreta RRTL,E.P ne’ebé Preizdente Konsellu Administrasaun RTTL,e.P, Elizeu Isaac Fernandes hatún despaxu fó ba kompañia rua ne’ebé la prienxe rekizitu adinistrativu no aprezenta kustu boot. Foto/Repro
“Ha’u la hatene, kazu hanesan ne’e investigasaun maka seidauk hotu karik, tanba ne’e husu bá Ministériu Públiku, ténke verifika ho prova sira ne’e ho sériu, no buka prova sufiénte atu bele halo akuzasaun,” Jurista Padre Júlio Cripin Belo hateten hodi responde Hatutan.com liuhosi telefo, Tersa (25/11/2025).
Nia dehan, se sasin sira tuir ona prosesu inkeritu iha Mnistériu Públiku ne’e hanesan deklarasaun hodi presiza prova ne’ebé natoon hodi bele halo akuzasaun.
Jurista Timoroan ne’e afirma, kazu hensan projetu fornesimentu kombustivél no manuténsaun karreta bá RTTL.E.P, Ministériu-Públiku iha obrigasaun atu aselera hodi bele konstitui hanensan krime depende bá provas husi investigasaun.
“Atu aselera kazu ne’e depende bá prova, sé prova laiha sira arkiva tiha maka ne’e,” Júlio Crispin Belo hateten.
Nia hateten, Ministériu Públiku tenke haree prova husi kompaña Aitula Fule’s Unipesoál Lda, no prova husi kompaña Mãe da Graça, inkuli desizaun Prezidente Konsellu Administrasaun RTTL.E.P Elizeu Isaac Frenandes ninia depaisu baze bá saída.
Nia dehan, se prova ne’e hatudu intrese favoritizmu, Ministériu Públiku bele akuza hanesan krime partispasaun ekonómiku, maibé sé Ministériu Públiku seidauk maka aprezenta bá Tribunál dala ruma prova sira ne’e seidauk sufisénte.
“Ha’u nia hanoin, kazu RTTL.E.P, Ministériu Públiku presiza prova ne’ebé sufisénte hodi halo akuzasaun,” Júlio Crispin Belo tenik.
Prezidente Konsellu Administrativu Rádiu Televizaun Timor-Leste, Empreza Públiku, (RTTL,E.P), Elizeu Isaac Fernandes, sai arguidu ba kazu projetu fornesimentu kombustivel no servisu manutensaun karreta iha RTTL,E.P.
Elizeu Isaac Fernandes, simu pose hanesan Prezidente Konsellu Administrasaun RTTL,E.P iha loron 13 fulan-Marsu 2025. Nune’e, to’o fulan-Outubru ne’e, nia foin assume knar ne’e ho tempu fulan-ne’en (6) liu loron-20-resin.
Informasaun ne’ebé Hatutan.com asesu hosi fonte iha Ministériu Públiku (MP) haktuir katak Prezidente RTTL,E.P Elizeu Isaac Fernandes, Sesta (03/10/2025), ba hatan ona iha MP ba kazu ho NUK: 0015/25.CACTL kona-bá fornesimentu kombustivel no servisu manutensaun karreta iha RTTL, E.P ne’ebé deskonfia abuzu poder, korrupsaun no hamósu prezuiju bá Estadu.
“Elizeu Isaac Fernandes ho dirijente sira seluk tan mai presta deklarasaun iha Prokuradór titulár ne’ebé simu kazu ne’e,” fontes informasaun ne’ebé husu atu la publika nia identidade ne’e haktuir.
Prezidente Konsellu Administrasaun RTTL,EP, Elizeu Isaac Fernandes ho nia ekipa dirijente sira RTTL,E.P to’o iha Edifísiu Ministériu Públiku iha tuku 8:30 dadeer Otl, hodi kumpri notifikasaun hosi Ministériu Públiku ho NUK: 0015/25.CACTL.
Iha Kuarta (01/10/2025), dirijente RTTL,E.P na’in-lima, kompostu husi na’in-rua presta deklarasaun iha parte dadeer no na’in-tolu seluk mai presta deklarasaun iha parte loraik iha MP relativa mós ho kazu projetu servisu fornesimentu kombustivel ho servisu manutensaun karreta nian.
Sira hirak ne’ebé ba presta deklarasaun iha MP ona ne’e mak hanesan Azinho Matus Fernandes, nu’udár Xefe Departamentu Aprovizionamentu, Noviana de Fátima Nahak, eis-diretóra Nasionál Administrasaun no Finansas RTTL,E.P, ho membru ekipa juri ba konkursu projetu servisu fornesimentu kombustivel ho servisu manutensaun karreta RTTL,E.P nian mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri).
Fó hanoin fila katak Prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes, deskonfia halo abuzu podér iha foti desizaun ba projetu servisu fornesimentu kombustivel ho servisu manutensaun karreta iha RTTL,E.P.
Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ho servisu manutensaun karreta ba kompañia rua (2) ne’ebé la prienxe rekizitu iha selesaun dokumentu no aprezenta presu boot ka la razoavel.
Tuir dokumentu relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebé Hatutan.com asesu hatudu, katak ekipa juri ho nia kompozisaun hanesan Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru iha loron 25 fulan-Abríl 2025, deside kompañia Aitula Fuel’s Unipessoal, Lda, hodi fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir duni rekizitu ne’ebé RTTL,E.P mensiona.
Tabela avaliasaun dokumentu ba projetu servisu fornesimentu kombustivel ho nia kustu ka presu $40,000.00, hatudu kompañia Aitula Fuel’s Unipessoal, Lda hetan valor 130 no aprezenta montante orsamentu ki’ik $34,39 kompara ho kompañia Mãe da Graça Unipessoal, Lda, ne’ebé prezidente Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu $35,78 no hetan valor iha avaliasaun dokumentu 115 de’it.
Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.
Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes, atu aprova pedidu relatóriu avaliasaun servisu fornesimentu kombustivel.
Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes, hatún despaxu husu favor Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.
Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu $20,000.00, ekipa juri ho nia kompozisaun juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekizitu ne’ebé RTTL,E.P husu.
Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.
Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva, atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.
Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep, Lda tanba bazeia ba esperiénsia servisu hamutuk ne’ebé profisionál no prontu bá RTTL,E.P.
Jornalista: Marcelino Tomae